Баст уыд Республикæ Цæгат Ирыстоны-Аланийы сæвзæрды æнусон юбилей бæрæг кæнынимæ
«100 азы: А-йæ Я-мæ». Чингуыты армукъа-фестиваль уыд Дзæуджыхъæуы. Баст уыд Республикæ Цæгат Ирыстоны-Аланийы сæвзæрды æнусон юбилей бæрæг кæнынимæ. Мадзал байгом дисскусийæ «Нымæцы дуг. Мыхуыры чиныджы фидæн: цард æви рохуат?». Фестивалы архайджытæн æмæ уазджытæн республикæйы сæргълæууæджы номæй раарфæ кодта вице-премьер Александр Реутов. Мадзалы кадджын уазæг сси Уæрæсейы чиныгуадзджыты ассоциацийы президент Константин Чеченев. Уый куыд загъта, афтæмæй нымæцон технологиты дуджы мыхуыры чингуытæн æнцон нæу, фæлæ фæстаг рæстæг паддзахад стыр æргом здахы ацы хъуыддагмæ æмæ уавæр хуыздæр кæны. Æрвылаз библиотекæтæн дихгонд цæуы президентон грант 550 милуан сомы, байуарынц сæ регионтыл. Цæгат Ирыстоны нымад у бæстæйы чингуытæ фылдæр кæм кæсынц, ахæм регионтæй иуыл. Республикæйы ис 9 рауагъдады. Уадзынц дзы алыхуызон литературæ. Армукъа-фестивалы куыст ахаста 3 боны. Мингай чингуытæ равæрдтой Цæгат Ирыстоны æмæ Цæгат Кавказы федералон зылды иннæ регионты рауагъдадтæ, стæй Хуссар Ирыстонæй æмæ Мæскуыйæ уазджытæ. Фестивалы программæйы уыд зындгонд литературон авторты дæсныйадæвдисæг ахуыртæ, аивадон æмæ анимацион кинонывты равдыст, музыкалон æмæ театралон номыртæ, поэтикон фембæлдтытæ, викторинæтæ. Мадзал сарæзта республикæйы мыхуыры æмæ дзыллон коммуникациты хъуыддæгты комитет Уæрæсейы культурæйы министрады æххуысæй.
