Раздæр нысанон-техникон æркаст раиртæста, медицинон куыстуаты хъармгæнæн кæй ис аварион уавæры, æмæ дзы ног хъармгæнæн сезоны спайда кæнæн нæ уыдзæн
Республикæйы дондзæуæн куыстуаты специалисттæ Дзæуджыхъæуы ног теплотрассæ æвæрынц Маркусы уынджы физиотерапевтон рынчындонмæ. Раздæр нысанон-техникон æркаст раиртæста, медицинон куыстуаты хъармгæнæн кæй ис аварион уавæры, æмæ дзы ног хъармгæнæн сезоны спайда кæнæн нæ уыдзæн. Специалисттæ куыстытæ бакодтой къуырийы мгъуыдмæ. Сæйраг архайд цыди æхсæвыгон, цæмæй горæты центр къуылымпы ма баййафа, уый тыххæй. Ног теплотрассæйы сæвæрдтой дыгай хæтæлтæ, йæ дæргъ у 320 метры. Уыимæ цæуы Тамайы-фырты уынгыл, Дзанайты Иваны уынгимæ цæхгæр. Физиотерапевтон рынчындонæй уæлдай ма центрон магистральмæ баиу кæндзысты 22-æм рæвдауæндон. Фæстæдæр дондзæуæн куыстуаты аивгæнæн хайады специалисттæ райдайдзысты асфальт ноггæнæн куыст кæнын.
