Форум сæмбырд кодта 170 студентæй фылдæры – Цæгат æмæ Хуссар Ирыстонæй рацæугæ фæсивæды
Пансионат «Урсдон»-ы дарддæр цæуы сæрдыгон студентон слет «Æрыгон». Форум сæмбырд кодта 170 студентæй фылдæры – Цæгат æмæ Хуссар Ирыстонæй рацæугæ фæсивæды. Форум цæудзæнис 9-æм августмæ. Архайджытæн бацæттæ кодтой тренингтæ, лекцитæ, командæйы куыстытæ æмæ дæсныйадæвдисæг ахуыртæ. Студентты сахуыр кæндзысты æлыгимæ кусын, сæракæй дзаумæттæ аразын, ирон чъиритæ фыцын æмæ афтæ дарддæр. Райгуырæн зæххы атмосферæ банкъарын, студентон фæсивæды фенгомдæр кæнын, регион ног хуызы раргом кæнын. Уый у слет «Æрыгон»-ы нысанты æрмæст чысыл хай. Чехойты Фатимæйæн ныхасы бар.
Алина Зубеева йæхи фæлвары чъиритæ кæнынæй. Æрыгон чызг Ирыстонмæ ссыд студентон экспедицион корпус «Команда Арктики»-имæ. Уый у Уæрæсейы технологон университеты проект. 10 бархионы фыццаг хатт сты Ирыстоны.
Студентты сæрдыгон слет «Æрыгон» райдыдта Урсдоны. 170 студентæй фылдæр Уæрæсейы алы регионтæй ссыдысты нæ республикæмæ. Фæнды сæ Ирыстоны аивадимæ базонгæ уæвын, банкъарын нæ адæмы царды миниуджытæ, ссарын ног хæлæрттæ. Слеты архайджытимæ фембæлдысты Паддзахадон Думæйы депутат Сергей Бурлаков, Зонæдты центр «Машук»-ы генералон директор Антон Сериков, Адæмон хæдзарады æмæ паддзахадон службæйы Уæрæсейы академийы ректор Алексей Комиссаров. Æмбырды раныхас кодта Республикæйы сæргълæууæг Сергей Меняйло.
Арктикæйы командæйы архайджытæ æнтыстджынæй райдыдтой нæ регоны культурæимæ зонгæ кæнын. Ныридæгæн уал федтой, нæ кафджытæ куыд арæхстджынæй кæнынц ирон кæфтытæ æмæ ма дурынгæнæджы къухтæй хæдзары мигæнæнтæ куыд равзæры, уыдæттæ. Бæстæйы профессионалон кусджыты, æрдзон, историон æмæ культурон хæзнатæ цæстыгагуыйау чи хъахъхъæна, ахæмты раиртасыны тыххæй арæзт æрцыд студентон экспедицион корпус.
Ацы аз командæ Арктикæйы бархионтæ сæ ахсджиаг хæсимæ уыдысты Антарктидæйы, Тиберкæйы, Ненецты фæдзæхст бынаты æмæ ма иннæ адæмы цы бирæ цымыдисаг бынæттæ фенын фæнды, ахæм æндæр регионты. Ныр та ссыдысты Цæгат Ирыстонмæ.
Экспедицион корпусы бархионтæн арæзт цæудзысты кусæг балцытæ. Фæсивæд архайдзысты Цъæйы комы экологон къахвæндагыл æмæ æхсæрдзæн Кольцомæ фæндагыл æфснайæн куыстыты. Арктикæйы командæ цæттæ у Цæгат Ирыстоны экологийæн æххуысы хъуыддагмæ йе *вæрæн баххæссынмæ.
