Сæкæрниз кæмæ ис, республикæйы уыцы цæрджытæ арæхæй арæхдæр æмбæлынц, инсулинæй æххæст препараттæ афтекты кæй нæ фаг кæны, ахæм уавæримæ. Адæм хъаст кæнынц, рецепттæм гæсгæ хъæугæ хостæ сæ бон райсын кæй нæу, уымæй. Риссаг фарстайы тыххæй профилон ведомствæты æмæ куыстуæтты зонынц, æмæ архайынц йæ алыг кæныныл. Бæлвырддæр радзурдзæн Хъайтмазты Дзерассæ.
Хъайтмазты Андреймæ сæкæрниз 28 азы ис. Йæ хызыны – льготæтæм гæсгæ цы препараттæ æмбæлы, уыдоны рецепттимæ бирæ сыфтæ. Фæлæ се *ппæтмæ гæсгæ нæ райста хостæ, иуæй-иутæн се мгъуыд фæцис, æмæ уым нæлгоймаджы аххос нæй.
Ацы 3 мæйы Андрейæн æххуыс кодтой йæ зонгæтæ – Мæскуыйæ йын æрвыстой хостæ. Инсулины помпæйæн цы хæйттæ хъæуы, уыдон бахъуыд хи балхæнын. Афтекты рецептон препараттæ куы нæ вæййынц, ахæм уавæримæ сæкæрнизæй рынчын адæм арæх сæмбæлынц.
Хи фæрæзтæй балхæнынæн препараттæ афтекты сты. Фæлæ сæ хъæугæ æрмæджытимæ балхæнын алкæйы бон нæу, зæгъы Хъайтмазты Андрей.
82-æм афтечы хостæ дæттынц республикæйы дзæбæхгæнæн кусæнуатты рецепттæм гæсгæ. Ардæм адæм æрбацæуынц инсулинмæ. Ацы аз фармацевттæ сæххæст кодтой 2 мин рецептæй фылдæр 120 милуан сомæн. Ахсджиаг препарат куы фæзыны, уæд афтæчы кусджытæ фехъусын кæнынц рынчынтæн æмæ рынчын сывæллæтты ныййарджытæн.
Хъæугæ рецептурон хостæ рæстæгмæ кæнæ æдзух кæй нæ вæййынц афтекты, уый тыххæй зонынц æнæниздзинадхъахъхъæнынадмæ цæстдарды территориалон органы. Лыггæнинаг фарстатæ ис æрмæст сæкæрнизæй нæ, фæлæ онкологон рынчынты дæр хостæй æххæст кæнынимæ
Дохтырты сæйраг хæстæй иу у, хъæугæ препарат куы нæ уа, уæд æй æмаргъ хосæй баивын. Хибарæй уыцы хъуыддаг æххæст кæнын нæй.
Хъайтмазты Андрейæн стационары снысан кодтой хостæ цас æмæ цал хатты нуазын хъæуы, уый. Фæлæ уыцы хос куы нæ вæййы, уæд нæлгоймаг æндæр препарат нуазыныл разы нæу. Куыд зæгъы, афтæмæй алкæцы дæр организмыл алыхуызон ахады.
Республикæйы æнæниздзинадхъахъхъæнынады министрады куыд радзырдтой, афтæмæй льготæтæм гæсгæ хостæй æххæст кæныны бюджет арæзт фæцæуы августæй октябрьмæ иннæ азæн, фæлæ уый кæронбæттæн фæрæзты бæрц нæ вæййы. Афæдзы дæргъы вæййы курдиæттæ ног рынчынтæн ног амындтытимæ æмæ сæ сæххæст кæнынæн радих кæнынц уæлæмхасæн æхца.
2024-æм азы льготæтæм гæсгæ хостæн, æмтгæй райсгæйæ, радих кодтой 972 милуан сомы, республикон бюджетæй – 489 милуаны. Афтекты чидæр исы хъæугæ хостæ, чидæр æнæ ницæмæй ацæуы. Фарстамæ цæст дарынц æппæт профилон ведомствæты, фæлæ нырма æххæстæй лыггонд нæу.
