Фесты æппæт демонтажон æмæ электротехникон куыстытæ
Дзæуджыхъæуы бындуронæй цалцæг кæнынц сывæллæтты 3-æм поликлиникæ. Фесты æппæт демонтажон æмæ электротехникон куыстытæ. Специалисттæ баивтой бæстыхайы сæр, лифты кусæнгæрзтæ, сæвæрдтой вентиляцион системæ. Ныртæккæ объекты цæуынц мидæгæй аивгæнæн куыстытæ. Базилдзысты йын йе ддаг бакастмæ дæр. Куыстытæ æххæстгонд цæуынц нацпроект «Æнæниздзинадхъахъхъæнынад»-мæ гæсгæ. Бæлвырддæр Хъайтмазты Дзерассæйы æрмæджы.
Ацы поликлиникæ куы байгом, уæдæй дзы фыццаг хатт цæуы бындурон цалцæг. 42 азы фæлæггад кодта æмæ йæм æнæмæнг хъуыдис базилын. Ныртæккæ цалцæг йæ тæмæны ис. Фесты æппæт демонтажон æмæ электротехникон куыстытæ. Специалисттæ баивтой бæстыхайы сæр, сæвæрдтой вентиляцион системæ, бауагътой æппæт коммуникацитæ. Сывæллæтты 3-æм поликлиникæйы бындурон цалцæджы куыст кæнынц 20 адæймаджы онг радмæ. Ног хуызы куыстытæ куы фæзына, уæд æрбахондзысты æндæр специалистты дæр.
Ныртæккæ поликлиникæйы цæуынц аивгæнæн куыстытæ. Кусджытæ къултæ штукатуркæ кæнынц, иуæй-иу кабинетты бавнæлдтой ахорынмæ. Æвæрынц плитатæ. Ноггонд æртæуæладзыгон бæстыхайы уыдзæн гранитон бацæуæн зонæ сывæллæтты коляскæтæ ныууадзын кæм уыдзæн, ахæм бынæттимæ. Объект цæттæ у 70 процентæн. Тагъд ног поликлиникæ райдайдзæн лæггад кæнын сабитæн.
Бындурон цалцæджы проекты алцыдæр хыгъд æрцыд – суанг кабинетты къулты хуыз æмæ дизайн дæр. Сæрмагонд æргом аздæхтой, йе нæниздзинад хъыгдард кæмæн у, уыцы адæмæн уавæртæ саразынмæ. Поликлиникæйы разамонæджы ныхæстæм гæсгæ, кусæнуат лæггад кæны 10 мин сывæллонæн æмæ сæйраг хæс у, алкæмæндæр зæрдæмæдзæугæ уавæртæ скæнын.
Пъланмæ гæсгæ саив кæндзысты поликлиникæйы алыварс территори дæр. Бындурон цалцæг æххæстгонд цæуы нацпроект «Æнæниздзинадхъахъхъæнынад»-мæ гæсгæ.
