Акъоты Тамарæйы руаджы кæрт саив
Сирень, уардитæ, юккæтæ, кактустæ æмæ лимонтæ. Дзæуджыхъæуы бирæуæладзыгон хæдзæрттæй иуы кæртмæ бацæугæйæ, фенæн ис амæй ай рæсугъддæр дидинджытæ. Акъоты Тамарæйы руаджы кæрт саив. Æххуыс ын кæнынц йæ сыхæгтæ дæр. Бæлвырддæр радзурдзæн Чехойты Фатимæ.
Юккæтæ дидинæг фæкалынц сæрдыгон – июльæй августмæ. Фæлæ Кольбусы уынджы 44 -æм хæдзары кæрты ацы бонты фенæн уыдзæн йе стыр урс дидинæг. Цæрджытæ йын цин кæндзысты йæ рæсугъддзинадыл. Фæззыгон юккæ дидинæг ракалдзæн, уый æнхъæл нæ уыдысты.
Акъоты Тамарæйы куы бафæрсай, цал азы йыл цæуы, уый, уæд фæлмæн мидбилхудгæ фæзæгъы – 80 азæй фылдæр, зæгъгæ. Уый хъæппæрис уыд кæрты алыхуызон зайæгойтæ ныссадзын. Тамарæ йæхæдæг райдыдта къахын хæдзары ныхмæ уæгъд зæххы хай. Уый фенгæйæ йæ фарсмæ æрбалæууыдысты йæ сыхæгтæ дæр.
Хæдзары цæрджытæ иумæ саив кодтой сæ кæрт. Сирень, лимон, юккæ, уардитæ æмæ кактустæ æмæ ма бирæ æндæр рæсугъд зайæгойтæ ныссагътой сæ кæрты. Гаситы Наталья иннæ сыхæгтæй раздæр æрбалæууыд Акъоты Тамарæйы фарсмæ.
Сылгоймæгтæн æппæтæй зындæр у зайæгойтыл дон кæнын. Ведратæй дон хæссын сын æнцон нæу. Фæлæ сын сæйрагдæр у дидинджыты рæсугъддзинад адæмæн фенын кæнын. Акъоты Тамарæйы хуызæн зайæгойтæм уарзондзинад разынд йæ сыхаг сылгоймæгты зæрдæты дæр.
Ныридæгæн сылгоймæгтæ æвзарынц уалдзæгмæ зайæгойты хуызтæ. Фæнды сæ, рæсугъд дидинæг чи калы, ахæмтæ ныссаддзын, цæмæй сæ уынд æхсызгондзинад хæсса кæрты цæрджытæн æмæ уазджытæн.
