32 азы размæ 30-æм октябры æхсæвы фыдгæнджыты къорд æрбабырста Горæтгæрон районмæ. Фæндыд сæ Ирыстоны зæххыты хай сæхи бакæнын
Цæгат Ирыстоны мысынц 1992 азы фæззæджы цы цаутæ æрцыд, уыдоны амæттæгты. 32 азы размæ 30-æм октябры æхсæвы фыдгæнджыты къорд æрбабырста Горæтгæрон районмæ. Фæндыд сæ Ирыстоны зæххыты хай сæхи бакæнын. Сæ бинонты æмæ сæ хæдзæрттæ бахъахъхъæнынмæ сыстадысты мингай бархионтæ. Уыдонæй бирæтæ фæмард сты. Уымæй дарддæр ма абон нæ бæстæйы мысынц политикон репресситы амæттæгты. Афтæмæй ссарынц, ивгъуыд æнусы 20-50-йæм азты репресситы æнаххосæй чи бахауд, уыцы адæмы рухс нæмттæ. Æрмæст нæ республикæйæ уыцы сау номхыгъды ис 20 мин адæймагæй фылдæр. Уыдонæй 14 мины фехстой. Уыцы боны кадæн, традицимæ гæсгæ, абон дидинджытæ сæвæрдзысты монумент цæссыгты дурыл, Дзæуджыхъæуы.
