Фæззыгон-зымæгон рæстæг инфекцион вирусты низтæ стыхджын вæййынц
Цæгат Ирыстоны дарддæр цæуы æхснырсæджы ныхмæ вакцинаци. Фæззыгон-зымæгон рæстæг инфекцион вирусты низтæ стыхджын вæййынц. Специалисттæ куыд зæгъынц, афтæмæй афоныл конд прививкæ баххуыс кæндзæн иммунитет фæфидардæр кæнынæн. Адæймаг нæ фæрынчын уыдзæн, кæнæ та низ рог хуызы ацæудзæн. Гриппæй вакцинæйæ фæстæмæ ма республикæмæ æрбацыд пневмококкæй препарат дæр. Бæстондæр радзурдзæн Хъайтмазты Дзерассæ.
Æрвылаз æмæ афоныл прививкæ кæнын – æнæмæнг хъæуы, зæгъы Кокойты Дианæ. Ахсджиаг у æрмæст хи нæ, фæлæ сывæллæтты дæр бахъахъхъæнын. Дианæ йæ хæстæджыты æнæниздзинадмæ кæрцхъус у. Бинонтæн ис традици æдзух вакцинаци цæуын.
Фæззыгон-зымæгон æмæ уалдзыгон рæстæг æхснырсæгæй рынчынты нымæц фæфылдæр вæййы. Æппæтæй парахатдæр инфекцион вирустæй иу у грипп. Цæгат Ирыстоны ныртæккæ цæуы пъланмæ гæсгæ вакцинаци. Специалисттæ куыд зæгъынц, афтæмæй прививкæтæ цас фылдæр адæм скæной, уыйбæрц бæрзонддæр уыдзæн иумæйаг иммунитет. Республикæйы медицинон кусæнуаттæ райстой 3 хуызы вакцинæтæ. Гриппæй фæстæмæ ма, ис пневмококкæй препарат дæр. Дохтырты ныхæстæм гæсгæ, ахæм æмиу хуызы хосты ахадындзинад тыхджындæр кæны эпидемиологон сезоны.
Æнæмæнг прививкæтæ хъуамæ кæной дохтыртæ, ахуырады æмæ лæггад кæныны къабæзты кусджытæ, сиддонтæ æмæ паддзахадон службæгæнджытæ. Прививкæ кæныны процедурæ хуымæтæг у – скæнæн æй ис цалдæр минутмæ. Адæймаг та вирусæй афæдзы дæргъы вæййы хъахъхъæд.
Уæлдай тæссаг у ацæргæ адæмæн, сывæллæттæн æмæ иугæндзон низтæ кæмæ ис, уыдонæн. Дохтыртæ зæгъынц, вакцинаци чи бахъыгдара, уыцы æууæлтæ хæрз чысыл сты.
Ныртæккæ республикæйы вакцинæ скодтой 33 мин адæймагæй фылдæр. Кæй фæнды, уыдонæн сæ бон прививкæ скæнын у поликлиникæты.
