Кадджын мадзал арæзт æрцыд Национ музейы
Нæ бæстæйы сбæрæг кодтой адæмты иудзинады бон. Уый агъоммæ та Цæгат Ирыстоны Сæргълæууæг Сергей Меняйло паддзахадон хæрзиуджытæ радта, хицаудзинады оргæнты, культурæйы, æнæниздзинадхъахъхъæнынады, ахуырады æмæ æндæр къабæзтæм стыр æвæрæн чи бахаста, уыцы кусджытæн. Кадджын мадзал арæзт æрцыд Национ музейы. Сергей Меняйло се ппæтæн дæр раарфæ кодта бæрæгбоны фæдыл, æмæ загъта – нæ иудзинады æмæ æнгом æмархайды кæй ис нæ тых.
Уæрæсейы Президенты Указмæ гæсгæ, Чернобылы атомон электростанцæйы фыдбылызы фæстиуджытæ иуварс кæныны тыххæй Лæгдзинады Орденæй хорзæхджынгонд æрцыдысты Айларты Сергей æмæ Асланты Виктор. «Уæрæсейы Федерацийы наукæйы сгуыхт архайæг» сси Цæгат Ирыстоны паддзахадон медицинон академийы кафедрæйы сæргълæууæг Вадим Брин. Президенты кады гæххæтт лæвæрд æрцыд республикæйы æвзарæн къамисы сæрдары хæдивæг Хъуыдаккаты Сосланæн. Арфæйы гæххæтт æмæ риуылдаргæ нысан «Адæмон фронт. Алцыдæр Уæлахизæн», стæй республикæйы Сæргълæууæджы номæй сахат радтой æвзарæн къамисы сæрдар Моргуаты Жаннæйæн. Паддзахадон хæрзиуджыты аккаг ма систы Адæмон фронты регионалон штабы æмсæрдар Цæгæраты Руслан, компаниты къорд «Бавари», Къазнайы федералон управленийы цæгатирыстойнаг хайад, æнæниздзинадхъахъхъæнынады кусджыты профцæдисты организаци, культурæйы министр Фидараты Сослан, парламенты депутат Сурен Манукянц, Алагиры районы цæстдарæн-нымайæн палатæйы сæрдар Дзарасаты Маринæ, æнæххæстбарджын æхсæнады директор Баймæтаты Олег, бирæсывæллонджын бинонты æхсæнадон организацийы разамонæг Дзоблаты Альбинæ. Уымæй дарддæр цалдæр специалисты схорзæхджын кодтой сæ къабæзты сгуыхт кусæджы кадджын нæмттæй.
