Почтовыйы æмæ Родниковыйы уынгтæм у иунæг бацæуæн
Южныйы поселочы цæрджытæ тæрсынц, сæ хид куы ныккæла, уымæй. Почтовыйы æмæ Родниковыйы уынгтæм у иунæг бацæуæн. Конструкци уæзласæн машинæтæн нысангонд нæу. Ныр ыл ласынц зæхцъар. Афтæмæй фæндаг ныппырх, хиды уавæр зæрдæхсаинаг у, алыварс та чъизи. Сæ риссаг фарстатимæ цæрджытæ фæсидтысты адæмон фронтмæ. Бæлвырддæр радзурдзæн Хъайтмазты Дзерассæ.
Пырх фæндаг, кæлæддзаг хид æмæ алыварс чъизи. Ахæм уавæрæй тыхсынц Южныйы поселочы цæрджытæ. Рим Иванов куыд зæгъы, афтæмæй цалдæр бонмæ уæзласæн машинæтæ æххæстæй ныппырх кодтой фæндаг. Ныртæккæ бынæттон цæрджытæ тæрсынц хидыл цæуын. Карз фæлварæн ацыд. Уæзласæнтæ уыйбæрц зæхцъар ластой, æмæ-иу суанг сæ былтæй цæугæдонмæ акалд. Уый цавæр зиан æрхастаид арæзтадæн? Ахæм фарста ис адæммæ. Южныйы цалдæр хæдзары цæрджытæн æрмæст ацы хидыуылты ис рацæуæн поселокæй.
Зындæр у такси баххуырсын дæр. Шофыртæ нæ разы кæнынц ацы фæндагыл цæуыныл. Æрæджы дæр ма æххæстæй асфальтгонд уыд, ныр раздæры уæлцъарæй ницы уал баззад. Цæрджытæ сæ хъаст адæмон фронтмæ бахастой, загътой, кæй тæрсынц, хид куы ныккæла, уымæй. Æхсæнадон архайджытæ фæнд кæнынц Дзæуджыхъæуы администрацимæ фæсидын, цæмæй зæхцъар чи ласта, уыцы арæзтадон компаниимæ иумæ бацархайой сæ куыстмæ ивддзинæдтæ бахæссыныл, сæрмагондæй та, уæз фæкъаддæр кæнын, кæнæ та маршрут аивын.
Ацы уаццагыл Южныйы раздæр уыд бæхты спортивон скъола. Ныр ис Цæгат Ирыстоны мидхъуыддæгты министрады бæрны. Ацы территорийы сфæнд кодтой, министрады товарон-материалон хæзнатæ дарынæн фæз скæнын. Хидмæ æркæсынмæ рацыдысты ведомствæйы специалисттæ бындурон арæзтады хайадæй. Куыд загътой, афтæмæй нæдæр хиды бындуры, нæдæр йæ цæджындзты, фазтæ нæ рабæрæг. Фæлæ уæддæр уæзласæн машинæты цыды тыххæй, хид æмæ йæ алыварс территори зынгæ фæчъизи сты, æмæ фæзынд цæлхвæд. Мидхъуыддæгты министрады куыд загътой, афтæмæй ацы фæстиуджытæ аиуварс кæнынæн æппæт хъæугæ мадзæлттæ сæххæст кæндзысты.
