Специалисттæ æмæ техникæ фæллой кæнынц æхсæвæй-бонæй
Миты æруардимæ куыстуат «Спецэкосервис» рахызт сæрмагонд куысты фæткмæ. Специалисттæ æмæ техникæ фæллой кæнынц æхсæвæй-бонæй. Æфснайынц Дзæуджыхъæуы фæндæгтæ. Куыстуаты куыд зæгъынц, афтæмæй сæм ацы хъуыддаг æххæст кæнынæн алцы дæр ис. Бæлвырддæр хабæрттæ радзурдзæн Хъайтмазты Дзерассæ.
Æцæг митын аргъау зымæджы размæ. Æмæ кæд, кæмæндæр уынгты мит – æхцондзинад у, уæд «Спецэкосервис»-ы специалисттæн та – æрдзон фæзындимæ тох. Коммуналон куыстуаты автопарчы ис æфснайæн машинæтæ, автогрейдертæ, уæзласæнтæ æмæ трактортæ. «Спецэкосервис»-мæ хауынц Дзæуджыхъæуы фæндæгтæ. Ацы бонты мит æфснайыныл архайынц техникæйы 40 иуæгæй фылдæр æмæ дæсгай кусджытæ. Специалисттæ фæллой кæнынц сæрмагонд фæткмæ гæсгæ – æхсæвæй-бонæй.
Ахадгæдæр куыстæн фæндæгтæм ракæнынц уæлæмхасæн стыргабаритон техникæ. Сæрмагонд æргом – тротуарты уавæрмæ. Фистæгæйцæуæн фæндæгтæ сыгъдæг кæныны куыстытæ дæр не *рлæууынц. Службæйы специалисттæ куыд зæгъынц, афтæмæй транспорт фаг кæны.
Мит æнæрлæугæйæ кæй цыд, уымæ гæсгæ фæндæгтæ æдзух пырх кодтой змис æмæ цæхх хæццæйæ. Профилон куыстуаты минæвæртты ныхæстæм гæсгæ, уый зиан нæ хæссы. Автоколоннæйы хицау Гутъынаты Алан æмбарын кæны, адæмæн, цæрæгойтæн æмæ транспортæн тæссаг чи у, ахæм реагенттæ дзы нæй.
Профилон службæйы специалисттæ ма шофыртæм иу хатт сидынц, цæмæй фæндæгтыл лæмбынæгдæр уой. Цæмæй фыдбылызтæ ма æрцæуа, уый тыххæй ахсджиаг у, фæндаггон æгъдæуттæ æххæст кæнын æмæ боныхъæды уавæртæ хынцын, стæй зæрдыл дарын, алкæмæдæр хæдзары хиуæттæ кæй æнхъæлмæ кæсынц, уый.
