Сæмбырд дзы кодтой поэт, публицист, тæлмацгæнæг Хозиты Яковы сфæлдыстад
Горæты центрон библиотекæйы уыд чиныг «Терчы хъаст»-ы презентаци. Сæмбырд дзы кодтой поэт, публицист, тæлмацгæнæг Хозиты Яковы сфæлдыстад. 22 азы йедтæмæ нæ фæцард, фæлæ ирд фæд ныууагъта ирон литературæйы. Хозиты Яков æвирхъауæй фæмард 1938-æм азы – Терчы найгæйæ, аныгъуылд. Цы сфæлдыстадон бынтæ ныууагъта, уыдон абон дæр актуалон сты. Авторы бирæ уацмыстæ сæфт æрцыдысты, бахъахъхъæнын кæй бантыст, уыдон бахастой чиныгмæ – эпиграммæтæ, фельетонтæ, балладæтæ, публицистикæ, тæлмацтæ. Чиныг рауадзынмæ стыр æвæрæн бахаста Хозиты мыггаг. Йæ саразæг, бæрнон редактор æмæ разныхасы автор у Цæгат Ирыстоны фысджыты Цæдисы сæрдар Хозиты Барис. Презентацимæ хуынд æрцыдысты сфæлдыстадон æмæ наукон интеллигенцийы минæвæрттæ, поэты хиуæттæ, æмхъæуккæгтæ. Мадзалы куыд загътой, афтæмæй Яков кæм ахуыр кодта, уыцы скъолайæн Кировыхъæуы лæвæрд æрцыд йæ ном.
