Фæлæ фæстаг рæстæг сæхимæ домынц æркаст
Дзæуджыхъæуы хидтæ цæрджытæн лæггад кæнынц дæсгай азты дæргъы. Фæлæ фæстаг рæстæг сæхимæ домынц æркаст. Иуæй-иу конструкцитæ сты бындуронæй цалцæггæнинаг. Специалисттæ зæгъынц, тыхсын нæ хъæуы. Проектон-сметон документацийыл ныртæккæ архайд цæуы. Рацарæзты куыстытæ дæр снысан кодтой. Бæлвырддæр хабæрттæ радзурдзæн Чехойты Фатимæ.
Ацы фаз цалдæр мæйы дæргъы тыхсын кæны цæрджыты. Чапаевы хиды бын галиуы *рдæм фæзилæн сæхгæдтой. Фæлæ фарста лыггонд нæма у. Алы бон дæр ауылты цæуынц сæдæгай адæм, уæлдайдæр та райсомæй ам бирæтæ фархайынц спортæй, изæрыгæтты та ардæм рацæуынц тезгъо кæнынмæ. Администрацийы куыд фехъусын кодтой, уымæ гæсгæ хиды бын ацы рацæуæн цалцæг кæндзысты æппæты раздæр. Арæзт æрцыд 50-йæм азты кæрон. Æфсæйнаг æмæ бетонæй арæзт конструкцийыл цæуынц машинæтæ æмæ трамвайтæ. Йæ дæргъ у 120 метры, йæ уæрх та – 35 метры. Бындурон цалцæггонд æрцыд ивгъуыд æнусы 90-æм азты. Ныр домы йæхимæ цæстдард.
Инженерон æркаст горæты хидтæ ацыдысты 2023 азы. Уæд фæндæгтæн проекттæ кæныны Центры специалисттæ Воронежæй сарæзтой æмбæлгæ иртæстытæ. Сæ хатдзæг уыд – хидтæн бындурон цалцæг скæнын 2030 азмæ. Дзæуджыхъæуы ис 10 конструкцийы – 6 машинæтæн, 4 – фистæгæйцæуджытæн. Арæзт æрцыдысты алы азты.
Дзæуджыхъæуы хидтæ адæмæн лæггад кæнынц дæсгай азтæ. Иу хатт сæ уидæгтæ ауагътой цæугæдоны бынмæ æмæ сæ сæ бынатæй ничиуал фезмæлын кæндзæн. Фæлæ Терчы фæйлауæнтæн сæ бон цы не сси, уый рауад рæстæгæн. Егъау конструкцитæ æдзух домынц лæмбынæг цæстдард. Специалистты хъуыдымæ гæсгæ, хидтæм рæстæгæй рæстæгмæ фæхъæуы æркæсын. Алы адæймаджы хуызæн уыдонæй алкæмæн дæр хъуамæ уа йæхи паспорт, æцæг техникон.
Цæугæдæтты сæрты иу былгæронæй иннæмæ бацæуынæн конструкцитæн ис æнусты истори. Адæм сæ раджы *рхъуыды кодтой. Кодтой сæ хъæдæй, дурæй, æфсæйнагæй, фæстæдæр та – æфсæйнаг æмæ бетонæй. Зæронд картæтæ бахъахъхъæдтой уыцы хабæрттæ. Дзæуджыхъæу азæй азмæ стырдæр кодта, рæзти Терчы дыууæ фæйнæфарс дæр. Уый тыххæй дзы хид æнæ саразгæ нал уыд. Фыццаг бындурон конструкци уыд, адæм цæнгæт хид кæй хонынц, уый, кæд рагæй цæнгæтæй конд нал у, уæддæр.
Пашковскийы уынджы хид ивгъуыд æнусы райдиан фæзынд йæ хъæдын *мбалимæ, сарæзтой йæ трамвайтæ цæуынæн. Ныр та Горькийы æмæ Коцойты Арсены уынгтæ иугæнæг конструкци нымад у, культурон нысаниуæг кæмæн ис, ахæм объектыл. Дыууæ дæр сты рацаразинаг.
Ирыстоны ног хидтæ аразынц ныр дæр. Фарон уыдонæй иу фæзынд Кольбусы æмæ Олег Кошевойы уынгты хсæн. Алы рæстæджыты инженерты хъуыдытæ æвдисæг конструкцитæ ныр дæр ма аив кæнынц Дзæуджыхъæу. Алы хид дæр йæ арæзтмæ гæсгæ у уникалон. Се *фсæйнаг дадзинты цæры истори. Ахсджиаг у уыцы истори бахъахъхъæнын.
