Ныридæгæн бакуыстой хицæн кадджыты текстыты адаптацийыл сывæллæттæн
Цæгат Ирыстоны театралон архайджыты Цæдис æххæст кæны проект «Нарты кадджыты аудиофыст сывæллæттæн ирон æвзагыл». Проект рамбылдта грант. Ныридæгæн бакуыстой хицæн кадджыты текстыты адаптацийыл сывæллæттæн. Тагъд бавналдзысты аудиохуызы фыссынмæ. Кадджытæ бакæсдзысты республикæйы зындгонд артисттæ. Æдæппæтæй ацы куыст ахæсдзæн 2 мæйы бæрц. Бæлвырддæр хабæрттæ радзурдзæн Хъайтмазты Дзерассæ.
Сабитæм Нарты кадджыты мидис фæхæццæ кæнын, уæлдайдæр та тексты æнæзонгæ ныхæстæ куы æмбæла, уæд – зын хæслæвæрд у. Фæрогдæр кæнын æй сфæнд кодтой Цæгат Ирыстоны театралон архайджыты Цæдисы минæвæрттæ. 47-æм рæвдауæндоны скодтой презентаци проектæн «Нарты кадджыты аудиофыст сывæллæттæн ирон æвзагыл». Хъомылгæнджытæ куыд загътой, афтæмæй сын стыр æххуыс уыдзæн сæ куысты.
Ныртæккæ проект æххæст кæныныл цæуы лæмбынæг архайд. Ныридæгæн бакуыстой хицæн кадджыты текстыты адаптацийыл сывæллæттæн. Уый тыххæй æрбахуыдтой поэт, тæлмацгæнæг Баситы Зæлинæйы. Куыд загъта, афтæмæй ацы куыст бæстон у. Хъуыдис æркæсын «Нарты кадджыты» алыхуызон рауагъдтæм, бакусын рæзгæ фæлтæрæн версийыл æмæ сæйраг мидис ма фесафын.
Æдæппæтæй иронау æмæ дыгуронау байхъусын уыдзæн эпосы 75 уацмысæй фылдæрмæ. Æвзæрст цыдысты кæсджыты кармæ гæсгæ. Кадджытæ кæсдзысты Ирыстоны зындгонд артисттæ. Се *хсæн Цæриаты Валерий дæр. Куыд загъта, афтæмæй ацы куыст у цымыдисаг æмæ уыимæ бæрнон, уæлдайдæр та сывæллæттæм арæзт кæй у, уымæ гæсгæ.
Проект рамбылдта грант. Театралон архайджыты Цæдисы сфæлдыстадон къорд ма раздæр бацæттæ кодта ахæм аудиофыст уырыссаг æвзагыл æмæ адæмы зæрдæмæ тынг фæцыд.
Æдæппæтæй ацы куыст ахæсдзæн 2 мæйы бæрц. Нарты кадджыты аудиофыст сывæллæттæн ирон æвзагыл спрезентаци кæндзысты рæвдауæндæтты æмæ скъолаты, астæуккаг æмæ уæлдæр ахуыргæнæндæтты.
