Бабæтдзæн Курсантов-Кировцевы уынг æмæ Джызæл
Дарддæр цæуы ног фæндаджы арæзтад Дзæуджыхъæуы цæгат-ныгуылæн хайы. Бабæтдзæн Курсантов-Кировцевы уынг æмæ Джызæл. Ныртæккæ йын йæ бын цæттæ кæнынц бетон æвæрынмæ. Фæндаг æмæ йæ алыварс территори донивылдтытæй бахъахъхъæныны тыххæй аразынц донвæд. Специалисттæ рацараздзысты къахвæндæгтæ фистæгæйцæуджытæн, ныффидар кæндзысты рухсгæнæнтæ. Уаццаджы дæргъ у 650 метры. Бæстондæр хабæрттæ радзурдзæн Чехойты Фатимæ.
Арæзтадон куыстытæ райдыдтой хæрзæрæджы. Фæндаджы ног уаццаг баиу кæндзæн Курсанттæ-Кировцевты уынг Джызæлимæ. Специалисттæ сбæрæг кодтой фæндаджы дыууæ хайы дæр. Фæллой дзы кæнынц 2 бригады æмæ 4 техникæйы фæрæзы. Фæндаджы дæргъ уыдзæн 650 метры.
Уаццагыл асфальт сæвæрын – куыстыты дыккаг къæпхæн. Уый фæстæ та бавналдзысты бордюртæ æмæ рухсгæнæнтæ фидар кæнынмæ. Ныртæккæ специалисттæ аразынц дондзæуæн. Йæ дæргъ уыдзæн 600 метры. Хъæхъхъæндзæн фæндаг æмæ йæ алыварс территори донивылдтытæй. Уый руаджы къæвдаты рæстæг дон цæудзæн Сау цæугæдонмæ. Фæнд кæнынц ам сыгъдæггæнæнтæ саразын дæр. Цæмæй къæвдайы дон, цæугæдонмæ бахауыны размæ, цæуа сыгъдæггонд.
Куыстытæ æххæстгонд цæуынц муниципалон программæмæ гæсгæ. Специалисттæ сæ нысан кæнынц афæдзы кæрон фæуын.
