Кинолентæ ист у фантастикæйы жанры, æмæ йыл бакуыстой ирыстойнаг кинематографисттæ
Кинойы хæдзары равдыстой ног киноныв «Монолог». Кинолентæ ист у фантастикæйы жанры, æмæ йыл бакуыстой ирыстойнаг кинематографисттæ. Автортæ бацархайдтой ахсджиаг фарстæн дзуапп раттыныл: куыд ахады аразгæ интеллект адæмы рæзтыл, йæ культурæйыл æмæ национ хиæмбарынадыл. Сюжеты астæу – иунæгæй чи цæры, ахæм нæлгоймаг. Раздæр уыд асторном. Ныр та у иунæг адæймаг, иронау чи дзуры, ахæм. Аразгæ интеллект куы фæзынд, уæд баззад æнæ куыстæй. Фæлæ йæ цард цæхгæр аивта, цымыдис роботыл куы фембæлд, уæд. Иумæ райдыдтой, ацæргæ лæг йæхæдæг кæй кодта, уыцы астрономон иртæстытæ кæнын. Киноныв истой Алагиры æмæ Дыгургомы. Режиссер у Таматы Ассан. Сценаристтæ – Рубайты Руслан, Зелимхан Фризен æмæ Дзабиаты Георгий. Оператор – Дмитрий Новиков. Монтажгæнæг Хъайттаты Сослан. Сæйраг роль йæхиуыл сбарста Цæгат Ирыстоны сгуыхт артист Хъæцмæзты Лазарь. Киноныв систой, культурон хъæппæристы Президентон фонды æххуысæй.
