Афæдзы райдианæй республикæйы се нæниздзинад сбæлвырд кодтой 167 мин адæймагæй фылдæр
Цæгат Ирыстоны дарддæр цæуы адæмы диспансеризаци. Афæдзы райдианæй республикæйы се нæниздзинад сбæлвырд кодтой 167 мин адæймагæй фылдæр. Диспансеризацимæ гæсгæ ис анализтæ раттын, электрокардиограммæ скæнын, цæстыты уавæр сбæлвырд кæнын æмæ æндæр ахсджиаг иртæстытæ сæххæст кæнын. Фарон та ма райдыдтой репродуктивон æнæниздзинады диспансеризаци дæр кæнын. Бæлвырддæр радзурдзæн Хъайтмазты Дзерассæ.
Гасситы Алан 7-æм поликлиникæмæ диспансеризацимæ фыццаг хатт æрбацыд. Куыд зæгъы, афтæмæй йын раздæр рæстæг нæ уыд. Ныртæккæ йе нæниздзинад сбæлвырд кодта, æмæ райгондæй баззад. Йæ зæрды ис ныр диспансеризаци æрвылаз цæуын. Йæ ныхæстæм гæсгæ, бирæ рæстæг нæ ахсы, йæ нысаниуæг та ахсджиаг у.
Фæстаг азты диспансеризаци сси иртæстыты сæйраг профилактикон хуыз. Йæ фæрцы æнтысы низтæ рагагъоммæ рабæрæг кæнын – зæрдæйы æмæ тугдадзинты, онкологон, сæкæрниз æмæ æндæртæ. Диспансеризаци æххæстгонд цæуы 2 къæпхæнæй.
Специалисттæ куыд зæгъынц, афтæмæй азæй-азмæ фылдæр адæм се ргом здахынц диспансеризацимæ. Зæгъæм, фарон 7-æм поликлиникæйы ацы хъуыддаг æххæстгæнгæйæ се нæниздзинад сбæлвырд кодтой 26 мин адæймагæй фылдæр. Ацы аз ма медицинон кусæнуаты райдыдтой ног хуызы иртаст æххæст кæнын.
Ахæм иртæстытæ афæдзы райдианæй Цæгат Ирыстоны скодтой 27 мин адæймагæй фылдæрæн. Æдæппæтæй та республикæйы диспансеризаци ацыдысты 167 мин адæймагæй фылдæр. Ацы хъуыддаг æххæстгонд цæуы национ проект «Дæргъвæтин æмæ активон цард»-мæ гæсгæ.
