Цæттæ кæны формæйы, сæрмагонд æмæ æрвылбоны уæлæдарæс
Æхсызгон æнтыстдзинæдтæ. «БТК групп» у стыр уæрæсейаг компани рог промышленносты къабазы. Цæттæ кæны формæйы, сæрмагонд æмæ æрвылбоны уæлæдарæс. 20 нырыккон хуыйæн фабрикæйы, 25 кусæн фæзы. Уыдоны фæллой кæны 25 мин адæймагæй фылдæр. Фабрикæтæй иу ис Хæзныдоны. Куыстуаты фыццаг юбилеймæ бацæттæ кодтой бæрæгбон. Бæлвырддæр хабæрттæ радзурдзæн Хъайтмазты Дзерассæ.
Хæзныдоны хуыйæн фабрикæ «БТК групп»-ы 5 азы юбилей бæрæг кæнынмæ бацæттæ кодтой стыр программæ. Сæ хуыздæр номертæ адæмы размæ рахастой республикæйы æмæ районы сфæлдыстадон къордтæ. Концерт сæ аивадæй барæсугъд кодтой сыхаг регионтæй уазджытæ дæр. Программæйы ирддæр хай та сси фабрикæйы кусджыты кæй схорзæхджын кодтой, уый. Хæрзиуæг саккаг кодтой Бериты Земфирæйæн дæр. Уый куыстуаты фæллой кæны, куы байгом, уæдæй фæстæмæ.
Хæзныдоны фабрикæ у бирæ кусæн фæзтæй иу. Ам ис уæлæдарæс цæттæ кæныны æххæст цикл. Нырыккон куыстуат æххæст у ногдæр ифтонггæрзтæй. Ныртæккæ цæстытыл зынтæй ауайдзæн, фæлæ раздæр фабрикæйы бæстыхайæ хъуыстис хуыйæн машинæты нæ, фæлæ спортивон тренажерты хъæр. Уый фæстæ бирæ рæстæг бæстыхай уыдис афтид. Фабрикæйы истори та дзы райдыдта хъæуы цæрджытæй. Боллоты Таймуразмæ фæсидтысты, куысты уавæртæ саразыны курдиатимæ.
Абон фабрикæйы фæллой кæны 64 адæймаджы. Уыдонæй цыппор фараст сты хуыйæн кусæнгрæзты оператортæ. Цæттæ кæнынц сæрмагонд уæлæдарæс æфсæддонтæн – сæрдыгон æмæ демисезоны формæ. Афæдзмæ бахуыйынц продукцийы 40 мин иуæджы. Кусынц бæрцыл нæ, фæлæ хæрзхъæддзинадыл.
Фабрикæйы разамынд куыд зæгъы, афтæмæй фæндты ис сæ архайд фæуæрæхдæр кæнын. Куыстмæ бацæуын кæй фæнды, ахæмтæ куы уа, уæд ма сараздзысты уæлæмхасæн цех.
