Дохтыртæ ультразвукы фæрцы рацарæзтой тугдадзинтæ
Республикæйы клиникон рынчындоны дыууæ бонмæ скодтой, абарæн кæмæн нæй, ахæм 5 операцийы. Дохтыртæ ультразвукы фæрцы рацарæзтой тугдадзинтæ. Ахæм операци фадат дæтты адæймаджы тугдадзинты структурæ хуыздæр фенынæн, æмæ стент сæвæрынæн. Ирыстойнаг дохтыртæ операцитæ скодтой Мæскуыйаг специалисттимæ. Темæйыл дарддæр радзурдзæн Чехойты Фатимæ.
Операцийы размæ – æнæмæнг иртæст ахуырадон лекцийы хуызæн. Дохтыртæ лæмбынæг ныхас кæнынц сæ архайды алы къæпхæныл дæр, стæй ног техникон фæрæзты хицæндзинæдтыл. Ахæм цæттæдзинад æххуыс у операцитæ бæрзонд уæлвæзадыл кæнынæн.
Республикон клиникон рынчындоны фыццаг хатт архайынц тугдадзинтæ рацаразыныл. Пайда кæнынц нырыккон медицинон техникон фæрæзтæй. Ультразвук æххуыс у тугдадзинтæн сæ хуылфмæ бакæсынæн, афтæмæй – операцийы алы къæпхæнмæ цæстдарынæн. Ахæм фæрæзтæ Цæгат Кавказы иу медицинон центры дæр нæй. Бынæттон специалисттæн уый у стыр къахдзæф республикæйы кардиохирургийы рæзты.
Республикæйы дохтыртæ ахуыр кæнынц Мæскуыйаг специалистты куыстыл. Операцитæ кæнынц бæстæйы сæйраг горæты медицинон кусджыты разамындæй. Уый æрмæст фæлтæрддзинад нæу, фæлæ куысты бынаты дохтыры дæсныйад фылдæр кæныны мадзал. Дыууæ бонмæ Мæскуыйаг специалисттæ скодтой 5 зын операцийы. Республикон клиникон рынчындоны дохтыртæ куыд фæбæрæг кодтой, афтæмæй ног азæй фæстæмæ кардиохирургтæн тугдадзинты операцитæ кæнын суыдзæн традицион хъуыддаг.
