Социалон кусджытæ сæ зонгæ кæнынц, цы æххуысы мадзæлттæ сын æмбæлы, уыимæ
Сæрмагонд æфсæддон операцийы архайджыты 700 бинонтæй фылдæры бабæрæг кодтой мобилон бригад «Помогаем СВОим»-ы специалисттæ афæдзы райдианæй. Социалон кусджытæ сæ зонгæ кæнынц, цы æххуысы мадзæлттæ сын æмбæлы, уыимæ. Кæнынц ма сын юридикон, психологон æххуыс, фæкæсынц сæм санаторитæм балцæгтæ райсынмæ, стæй сын фехъусын кæнынц, нæ хъæбатырты хиуæттæн лæвар сæ бон цавæр мадзæлттæ бабæрæг кæнын у, уый тыххæй. Бæлвырддæр радзурдзæн Хъайтмазты Дзерассæ.
Мобилон бригад «Помогаем СВОим» æххуыс кæны Хъæлыцты бинонтæн. Йæ фырт сæрмагонд æфсæддон операцийы зонæйы куы фæмард, уый фæстæ йæ мад Анетæ баззад иунæгæй. Сæвзæрдис зындзинæдтæ хæдзары гæххæттытæ скæнынимæ æмæ æмбæлгæ фиддонтæ райсынимæ. Ныр йемæ кусынц юристтæ æмæ социалон координатортæ – æххуыс кæнынц ахсджиаг фарстатæ алыг кæнын. Икъаты Алан дæр хъæбатырæй фæмард сæрмагонд операцийы, фыццаг бонтæй уыд фронты, йе *фсымæр та ныр дæр уым ис. Мобилон къордтæ абон архайынц, хъæбатырты мадæлтæн баххуыс кæныныл, зæгъæм, афоныл райсын хæрзхъæд медицинон æххуыс.
Тасойты Фатимæ у 28 азы фæлтæрддзинадимæ социалон кусæг. Уыцы рæстæгмæ баххуыс кодта сæдæгай ацæргæ адæмæн æмæ царды зын уавæры чи бахауд, уыдонæн. Абон йæ сæйраг хæс у – сæрмагонд æфсæддон операцийы бинонтæн æххуыс. Мобилон бригады хыгъды сты юристтæ, психологтæ, социалон куысты фæдыл специалисттæ. Алы балц дæр нысан кæны бæлвырд æххуыс æмæ фæлмæн ныхас. Ахсджиаг вæййы æрмæст риссаг фарстатæ алыг кæнын нæ, фæлæ байхъусын адæймагмæ. Проект «Баххуыс кæнæм иумæ» æххæстгонд цæуы дыккаг аз. Рæзы æмæ æххæссы фылдæрæй фылдæр бинонтыл.
Мобилон бригад «Помогаем СВОим»-ы республикон практикæ бахастой партион проект «Иугонд Уæрæсейы сылгоймæгты змæлд»-ы федералон методикон æмбыргондмæ. Проекты регионалон координаторы ныхæстæм гæсгæ, уый нысан кæны, сæ фæлтæрддзинад æнтыстджыныл нымад кæй æрцыд, æмæ йæ ныр бæстæйы иннæ регионты дæр кæй парахат кæндзысты, уый.
Мобилон къордты специалисттæ куыд зæгъынц, афтæмæй куыст ахадгæйæ цæуы, фæлæ уæддæр сæрмагонд операцийы се ппæт архайджытыл æмæ сæ бинонтыл аххæссын нæма бантыст. Æххуыс кæй хъæуы, уыдонæн æй у сæхи бон бацагурын социалон лæггад кæныны комплексон центрты кæнæ та фæллой æмæ социалон рæзты министрады. Æдæппæтæй республикæйы кусы 12 мобилон бригады. Афæдзы райдианæй се ххуыс райстой 700 бинонтæй фылдæр.
