филиал вгтрк государственная телерадиовещательная компания “Алания”

Ирыстоны райдыдта ирон адæмы кадджындæр бæрæгбæттæй иу – Лæгты Дзуармæ кувæн къуыри. Традицимæ гæсгæ, ахæсдзæн æнæхъæн къуыри. Бæрæгбон æрцæуы фæззæгмæ. Адæм бафснайынц сæ тыллæг, сæ хор, ралæууы куывдтæ æмæ чындзæхсæвты рæстæг. Ацы кадджын бæрæгбон нысан кæны ирон адæмы æгъдæуттæ æмæ удварны хæзнатæ хъахъхъæнын, у адæмы иудзинадыл дзурæг.  Нæ фыдæлты æгъдæуттæ æххæст кæнынц алы хæдзары дæр. Адæм фæкувынц Лæгты Дзуармæ, бафæдзæхсынц ыл сæхи æмæ Ирыстон. Не сфæлдисæгæй ракурынц æнæниздзинад, сабырдзинад, фарн æмæ амонд, бузныг фæзæгъынц, хъæздыг тыллæгæн æмæ фæкувынц фидæны азæн. Лæгты Дзуармæ кувæн къуыри фæбæрæг кæнынц æрмæст ирон адæм нæ, фæлæ республикæйы цы бирæ нацитæ цæры, уыдон дæр.