Архайдтой дзы регионы æххæстгæнæн хицаудзинады оргæнтæ, районты сæргълæуджытæ, стæй, инвестицион проекттæ чи æххæст кæны, ахæм бизнес-æхсæнады минæвæрттæ
Хицауады сæрдар Дзанайты Барисы размындæй уыд инвестицион архайды фæдыл æмбырд. Архайдтой дзы регионы æххæстгæнæн хицаудзинады оргæнтæ, районты сæргълæуджытæ, стæй, инвестицион проекттæ чи æххæст кæны, ахæм бизнес-æхсæнады минæвæрттæ. Республикæ ахадгæ куыст кæны инвестициты æргом раздахыныл æмæ ног куысты бынæттæ байгом кæныныл. Ацы хъуыддаджы хицауады хæс у инвестортæн алывæрсыг æххуыс кæнын. Инвесторты фæрцы царды рацыд бирæ проекттæ. Фæлæ сæйрагдæр у, нæ къухы куысты бынæттæ байгом кæнын кæй бафтыд, уыимæ та республикæйы бюджетмæ æфтиæгтæ кæй бахастам, уый, – загъта хицауады сæрдар. Экономикон рæзты министр Сокаты Марат загъта, ацы аз егъау инвестицион хъæппæристы статус лæвæрд æрцыди 8 проектæн. Сæ сæххæст кæнынæн радих кодтой 11 зæххы хайы. Зæрдæ дарæн ис, æппынкъаддæр 800 куысты бынаты кæй ратдзысты, ууыл. 2021-æм азæй ацы азы октябры онг республикæйы бюджетмæ стыр инвестицион проекттæ бахастой 700 милуан сомы, адæмæн скодтой 3200 куысты бынаты. Премьер-министр бахæс кодта, зæххы хæйттæй куыд пайдагонд цæуы, уый сбæлвырд кæнын. Къуылымпыдзинæдтæ кæм ис, уыдоны хъуыддагмæ ногæй æркæсын æмæ сын кæнæ баххуыс кæнын, кæнæ та бадзырд фехалын.
