Дохтыртæ низтæ райдиан къæпхæнтыл куы рабæрæг кæнынц, уæд рынчынтæ медицинон æххуыс афойнадыл райсынц. Уымæн у ахсджиаг алы адæймагæн дæр диспансеризаци ацæуын
Ивгъуыд аз 4-æм поликлиникæйы диспансеризаци ацыдысты 48 мин адæймагæй фылдæр. Дохтыртæ низтæ райдиан къæпхæнтыл куы рабæрæг кæнынц, уæд рынчынтæ медицинон æххуыс афойнадыл райсынц. Уымæн у ахсджиаг алы адæймагæн дæр диспансеризаци ацæуын. Бæстондæр радзурдзæн Чехойты Фатимæ.
Туджы сæкæры бæрзæнд æмæ холестерин сбæрæг кæнын, кардиограммæ скæнын, туджы æлхъывдад сбарын… Ольга Заваринæмæ кæд иугæндзон низтæ нæй, уæддæр аз иу хатт диспанзеризацийы фæлгæты ацæуы медицинон æркаст. Процедурæтæ æмæ экспресс-æркæстытæ скæны цыбыр рæстæгмæ, сæйрагдæр та – лæвар.
Рынчынмæ байхъусын æмæ йæ дарддæр медицинон æркастмæ арвитын у терапевтты хæс. Диспансеризаци фæцæуы дыууæ къæпхæнæй. Лабораторон æркæстыты хатдзæгтæ бæрæг вæййынц дыккаг бон.
Ивгъуыд аз 4-æм поликлиникæйы диспансеризаци ацыдысты 48 мин адæймагæй фылдæр. Медицинон кусджыты ныхæстæм гæсгæ, рынчынтæм арæхдæр рабæрæг вæййынц зæрдæйы æмæ ахсæны низтæ. Райдиан къæпхæнтыл раиртасынц онкологийы хуызтæ æмæ диабет, уымæ гæсгæ медицинон æххуыс райсынц афойнадыл.
Азæй азмæ фылдæр адæм ацæуынц профилактикон æркæстытæ. Медицинон профилактикæйы хайады сæргълæууæг Дзиуаты Зæлинæйы ныхæстæм гæсгæ, диспансеризаци ацæуын ахсджиаг у, адæймаджы йе *нæниздзинад куы нæ хъыгдара, уæддæр. Уымæн æмæ бирæ низтæ сæ райдиан къæпхæнты æрмæст афтæмæй рабæрæг кæнæн ис.
Дохтырты ныхæстæм гæсгæ, диспансеризаци æххуыс у низ райдиан къæпхæны рабæрæг кæнын. Профилактикон æркæстытæ адæмæн арæзт цæуынц национ проект «Дæргъвæтин æмæ активон цард» æххæстгæнгæйæ. Дохтырмæ йæхи ныффыссын адæймагæн фадат ис поликлиникæйы, кæнæ та «Паддзахадон лæггæдты» порталæй спайдагæнгæйæ.
