Мобилон бригадтæ цæуынц хъæутæм, цæмæй цæрджытæн бынаты се нæниздзинады уавæр сбæлвырд кæной, уый тыххæй
Цæугæ диагностикон комплекстæ дарддæр балц кæнынц Цæгат Ирыстоны районтæм. Мобилон бригадтæ цæуынц хъæутæм, цæмæй цæрджытæн бынаты се нæниздзинады уавæр сбæлвырд кæной, уый тыххæй. Куыст цæуы национ проект «Дæргъвæтин æмæ активон цард»-мæ гæсгæ. Бæлвырддæр радзурдзæн Хъайтмазты Дзерассæ.
Нартыхъæуы цæрджытæн сæ бон сси медицинон иртæстытæ сæххæст кæнын, районы ценртмæ ма рацæугæйæ. æркаст сарæзтой цæугæ диагностикон комплексы специалисттæ. Фæстæг рæстæгмæ мобилон бригадтæ республикæйы районтæм абалц кодтой мин æмæ рдæг хаттæй фылдæр. Ахæм куысты фæрцы дохтыртæн арæхдæр бантысы низтæ райдиан къæпхæнты раиртасын.
Цæугæ комплекстæ ифтонг сты фыццаг æркаст сæххæст кæнынæн кусæнгæрзтæй. Ам ис электрокардиограммæ, флюорографи, маммографи скæнын æмæ анализтæ радтын. Йе нæниздзинад хъыгдард кæмæн у, уыцы адæмы та мобилон комплексмæ æрбаласынæн ис сæрмагонд транспорт.
Мобилон комплексты куыст æххæстгонд цæуы национ проект «Дæргъвæтин æмæ активон цард»-мæ гæсгæ. Сæйраг хæс у, цæмæй æппæтæй дæрддзæф хъæуты дæр адæм афоныл исой хъæугæ медицинон æххуыс.
Ацы куыст дарддæр æххæстгонд цæудзæн. Дæрддзæф хъæуты цæрджытæн уый у æппæтæй æнцонвадатдæр гæнæн, горæтмæ ма рацæугæйæ квалификацион æххуыс райсынæн.
