Бæстæйы хуыздæр дохтырты консультаци райсыны фадатæй ацы аз спайда 500 адæймагæй фылдæр
«Иумæ онкологийы ныхмæ». Республикæйы онкодиспансеры Мæскуыйæ специалисттæ æмæ бынæттон эксперттæ-онкологтæ сарæзтой æркаст. Бæстæйы хуыздæр дохтырты консультаци райсыны фадатæй ацы аз спайда 500 адæймагæй фылдæр. Бæлвырддæр радзурдзæн Хъайтмазты Дзерассæ.
Рабæрæг кæнын риссаг фарста кæнæ та хуымæтæджы æрсабыр кæнын. Дохтыртæн-онкологтæн уый у æдзух практикæ. Константин Морхов у дæсны специалист. Проект «Иумæ онкологийы ныхмæ»-йы архайы йæ райдианæй. Цæттæ у кæмфæндыдæр цыфæнды афон дæр баххуыс кæнынмæ – йæ уарзон мæскуыйаг клиникæйы дæр, æмæ æрвылаз Дзæуджыхъæуы дæр кæны консультацитæ лæвар, рынчынтимæ йын æдзух вæййы бастдзинад.
Федералон центрты раззагдæр специалисттæм ацы аз сæхи ныффыстой 500 адæймагæй фылдæр. Бирæтæм дохтыртæ цæст фыццаг аз нæ дарынц. Адæмы ныхæстæм гæсгæ, ахæм профессионалты балцытæ республикæмæ ахсджиаг сты.
Онкомаммологтæ, онкогинекологтæ, химиотерапевттæ, æмæ æндæр специалисттæ. Цæгат Ирыстоны цæрджытæн баххуыс кæныны нысанимæ ныр 5-æм аз республикæмæ ссæуы стыр командæ. Акци аразæг Челæхсаты Оксанæйæн уый у æцæг уæлахиз. Кæддæр йæхæдæг сæмбæлд онкологон диагнозимæ. Цæмæй иннæтæн зындзинæдты сæрты æнцондæр хизын уа, уый тыххæй æххæст кæны хæрзаудæн проект «Иумæ онкологийы ныхмæ». Аххæссыд Уæрæсейы 80 регионæй фылдæрыл, æмæ баххуыс кодта мингай адæймæгтæн.
Мадзал арæзт æрцыд республикæйы сæргълæууæг Сергей Меняйлойы æмæ Цæгат Ирыстоны æнæниздзинадхъахъхъæнынады министрады æххуысæй. Онкологон службæйы райрæзты æмæ сæрмагонд æххуыс исын æнцонвадатдæр скæныны фæдыл куыст дарддæр æххæстгонд цæудзæн.
