Йæ алывæрсыг курдиатæн ын стыр аргъ кодтой аивадуарзджытæ
Ирон театры сыгъзæрин хъæлæс… Ацы бонты 80 азы сæххæст уыдаид Уæрæсейы сгуыхт артист Суанты Хъазыбегыл. Йæ алывæрсыг курдиатæн ын стыр аргъ кодтой аивадуарзджытæ. Сарæзта ирд сурæттæ театры сценæйы æмæ кинойы дæр, уæдæ йæ зарджытæ дæр адæмы зæрдæтæм арф хызтысты. Суанты Хъазыбеджы цардвæндаджы æмæ сфæлдыстады тыххæй радзурдзæн Хъайтмазты Дзерассæ.
Театр баиу кæнын куыд хъæуы, уый тыххæй кинохъайтар Зауырбег, цыма йæ сурæтсаразæг Суанты Хъазыбеджы фæлтæрддзинадмæ гæсгæ зыдта, уый хуызæн. «Семейная драма» куы истой, уыцы рæстæгмæ актер 7 азы лæггад кодта Цæгат Ирыстоны паддзахадон академион театрæн. Æмæ уыцы æмгуыстад ахаста 55 азы. Йæ курдиат сценæйы Суанты Хъазыбегæн раргом фыццаг бонтæй, æмæ йæ фæллойадон чиныджы сси иунæг куысты бынат. Ацы фæндаг ацыд сæрбæрзондæй, мысынц йе *мкусджытæ.
Аивады уæвын, цыма йæ хъысмæт уыд, афтæ. Хъазыбег, куыд йе фсымæртæ дæр, музыкалон курдиатæй фæхайджын йæ ныййарджытæй. Культурæйы къабазы Суантæ зындгонд уыдысты. Ким бацахста зарæггæнæн къабаз, Хъазыбег та фылдæр актеры дæсныйады раргом, уæвгæ, заргæ дæр æвзæрдæр нæ кодта. Æмæ-иу уымæй режиссертæ арæх пайда кодтой сценæйы æмæ кинойы.
Профессионалон архайды 50 азмæ Суанты Хъазыбег аивадуарзджытæн балæвар кодта дæсгай театралон сурæттæ. Йæ хъайтарты æнкъарæнтæ йæ бон уыд адæммæ бæлвырд фæхæццæ кæнын. Нæ сæ дих кодта сæйрагтыл æмæ фæрсагонтыл. Сценæйы хъазгæ нæ, фæлæ цæргæ кодта. Йæ курдиатæн ын стыр аргъ кодтой æрыгон æмкусджытæ.
Ирд сурæттæ сарæзта кинойы дæр. Йæ фыццаг роль уыд цыбыр – «Ах, любовь»-ы. Уый фæстæ сæйраг хъайтары æмбалы сурæт «Семейная Драма»-йы. Бакуыста криминалон драмæ «Курьер на восток»-ы дæр. Йе гæрон курдиатмæ Хъазыбегæн уыд хуымæтæг ахаст, уыдис æфсармджын адæймаг алы хъуыддаджы дæр.
Хъазыбеджы миниуджытæй ма иу уыд – иузæрдыгдзинад. Йæ зæрдæ никуы сивта йæ уарзон театрыл. Йæ царды фæстаг бон дæр арвыста уым. Йæ курдиат æмæ йæ намыс æнустæм баззайдзысты адæмы зæрдæты.
