Базонæн сæ ис алцыдæр сæкæрнизы тыххæй
Республикæйы 7 районы кусынц «Диабеты скъолатæ». Базонæн сæ ис алцыдæр сæкæрнизы тыххæй. Сæйраг ахуырад цæуы республикæйы эндокринологон диспансеры бындурыл. Ахæм мадзæлттæ æххæстгонд цæуынц национ проект «Дæргъвæтин æмæ активон цард»-ы фæрцы. Уымæй фæстæмæ ма профилон центры фæзынд ног офтальмологон ифтонггæрзтæ дæр. Бæлвырддæр радзурдзæн Хъайтмазты Дзерассæ.
Стъараполы медицинон университеты профессор эндокринологтæн дзуры, диабеты скъолайы ахуыртæ куыд кæнын хъæуы, уый тыххæй. Рынчыны уавæр хынцгæйæ сæрмагонд ахаст, диалогы хуызы куыст – уыдон специалисттæн сты бындурон домæнтæ.
Ахуырад æдзух ацæуынц республикæйы æппæт районтæй эндокринологтæ – диабеты скъолатæ архайынц Цæгат Ирыстоны 7 районы. Ныртæккæ квалификаци бæрзонддæр кæныны курс цæуы республикæйы æнæниздзинадхъахъхъæнынады министрады æххуысæй, Стъараполы медицинон университеты эндокринологийы æмæ сывæллæтты эндокринологийы кафедрæимæ иумæ.
Диабеты скъола дæтты, сæкæрниз кæмæ ис, уыцы адæмæн сæ диагноз бамбарыны, æдасæй хи уавæр бæлвырд кæнын сахуыр кæныны, хæрыны æмæ хосты бæрцы фæтк раст ивыны гæнæн. Технологитæ кæй ивынц, уымæ гæсгæ пациентты дзæбæх кæныны курс æдзух цæуын хъæуы – дыккаг хуызы сæкæрнизимæ адæмы æппынкъаддæр 3 азы иу хатт, фыццаг хуызы – афæдз иу хатт. Мадзæлттæ æххæстгонд цæуынц нацпроект «Дæргъвæтин æмæ активон цард»-мæ гæсгæ.
Сæкæрнизимæ рынчынтæн арæх вæййы къуылымпыдзинæдтæ сæ цæстытимæ. Уымæ гæсгæ афоныл офтальмологон иртæст у терапийы ахсджиаг хай. Эндокринологон диспансеры ахадгæйæ пайда кæнынц цæстыты компьютерон томографийæн ифтонггæрзты гæнæнтæй – Цæгат Кавказы у иунæг ахæм аппарат.
Кæд раздæр рынчынты хъуыд цæуын офтальмологон клиникæмæ, уæд ныр æппæт фарстатæ лыггонд цæуынц бынаты. Ис æппæт хъæугæ кусæнгæрзтæ – ультразвукæй иртæтстытæн аппарат, сæрмагонд микроскоптæ, лазерон кусæнгæрзтæ. Ифтонггæрзтæ райстой нацпроект «Дæргъвæтин æмæ активон цард»-мæ гæсгæ.
