Уый у экономикæйы æмæ регионы хъæздыг бынты сæйраг къабаз
Цæгат Ирыстоны кусæг балцы уыд креативон индустрияты æмæ адæмон æрмдæсныйады Федерацийы Советы къамис. Уый у экономикæйы æмæ регионы хъæздыг бынты сæйраг къабаз. Делегаци базонгæ æрмдæсныйады центрты, æрмадзты æмæ сфæлдыстадон фæзты архайдимæ. Стыр æргом аздæхтой национ брендтæм. Кусæг балцы программæйы ма уыд республикæйы Сæргълæууæг Сергей Меняйлоимæ фембæлд. Ныхас цыд традицитæ хъахъхъæныныл æмæ бынæттон продукци парахат кæныныл. Цавæр уынаффæтæ рахастой, уый тыххæй радзурдзæн Чехойты Фатимæ.
Рагон нывæфтыдтæ, хъæдæрмæгæй дзаумæттæ, керамикæ, национ дæрæс æмæ аивгæнæгтæ. Федерацийы Советы креативон индустрияты æмæ адæмон æрмдæсныйады къамисы уæнгтæ фыццаг бабæрæг кодтой Цæгат Ирыстоны адæмон аивадон æрмдæсныйады Центр. Кусынц дзы 80 курдиатджын адæймаджы республикæйæ алы районтæй. Алчидæр сæ хъахъхъæны традицион æрмдæсныйады хуызтæ, уыцы иу рæстæг сæ баххæст кæнынц нырыккон царды æууæлтæй. Делегацитæ равæрдтой сæ куыстытæ, дзырдтой къабазы рæзтыл.
Маршруты иннæ бынат уыд æлборты Асланы хæцæнгарзы æрмадз. 35 азы ам аразынц уникалон дзаумæттæ скифаг-сæрмæттаг стилы. Цирхъытæ, кæрдтæ, æрдынтæ, хотыхтæ. æрмдæснытæ скодтой мин предмæтæй фылдæр. Алы экспонатæн дæр йæ бындуры — археологон сгæрстытæ æмæ историон хатдзæгтæ. Радон предмет саразыны размæ æрмдæснытæ скæнынц бæстон иртасæн куыст, лæмбынæг æркæсынц архивон æрмæджытæм, хуызистытæм æмæ хæцæнгарзы рагон хуызтæм. Уазджытæн уыдис историмæ андзæвыны фадат — сæ уæлæ абарстой æфсæддонты реконструкцигонд хотыхтæ, аккаг аргъ скодтой ирыстойнаг æрмдæсныты курдиатæн.
Сенатортæ бабæрæг кодтой национ дарæсы галерей дæр. Иу тыгъдады — 30 бынæттон дизайнеры куысты. Авторон дарæс, аивгæнæнтæ — алы предмет дæр конд у ирон æрмдæсныты къухтæй, æххæст у национ колоритæй. Ахæм проектты рæзт у делегацийы ахсджиагдæр фæрстытæй иу. Фидæнмæ нысантæ — сфæлдыстадон куыстытæ парахат кæнынæн хæрзвадат уавæртæ аразын, æрмдæсныты цæттæ кæнын æмæ креативон экономикæйы дарддæры рæзт.
Уæлдай цæстдард — креативон къабазы фидæны рæзтмæ, адæмон аивадон æрмдæсныйадæн æххуысмæ регионалон æмæ федералон уæлвæзадыл, стæй бынæттон дизайнерты дарæс парахат кæнынмæ. Ныхас цыдис федералон центры æмæ регионы æмгуыстадыл традицион æрмдæсныйады хуызтæ хъахъхъæныныл æмæ сфæлдыстадон индустриятæн специалисттæ цæттæ кæныныл.
Программæйы нысангонд уыдис республикæйы Сæргълæууæгимæ фембæлд. Ныхас цыдис адæмон аивадон æрмдæсныйадыл. Уый у нæ историйы æмæ культурæйы хай, фæбæлвырд кодта Сергей Меняйло. Республикæйы ис профилон Ассоциаци, кусы адæмон аивадон æрмдæсныйады центр, рæзы цымыдисдзинад бынæттон мастерты куыстмæ. Регионы Сæргълæууæг куыд баххах кодта, афтæмæй къабазæн æххуыс цæудзæн дарддæр дæр, араздзысты уæлæмхасæн фадæттæ. Ныртæккæ аивадон æрмдæсныйады хуызтæ сты креативон индустрийы хай. Уый гом кæны ног фæрæзтæ паддзахадон æххуыс райсынæн, инвестицитæ агурынæн æмæ продукци Уæрæсейы æмæ фæсарæнты парахат кæнынæн. Фембæлды хатдзæгтæм гæсгæ федералон æмæ регионалон хицæуттæ баныхас кодтой дарддæр дæр иумæйаг куыст кæныныл. Цæмæй традицион æрмдæсныйадæн Цæгат Ирыстоны фæзына ног гæнæнтæ — йæ рæзтæн æмæ уæрæхдæр базарадмæ рацæуынæн.
