Цæрæгойты ирвæзын кæныны истори. Цæгат Ирыстонæй Волгоградмæ аластой 2 сидзæр арсы лæппыны. Волонтертæ сæ ссардтой мæллæг æмæ тарстæй. Сæ хъуыдымæ гæсгæ, сæ мад амард. Лæппынты хъæддаг сырдты ирвæзын кæныны æмæ реабилитацийы центр «Дино»-мæ хæццæ кодтой 2 мæйы. Се рбацыдмæ лæмбынæг цæттæ кодтой, сарæзтой сын æппæт хъæугæ уавæртæ. Бæлвырддæр радзурдзæн Хъайтмазты Дзерассæ.
Арсы лæппынтыл цалдæр мæйы йедтæмæ нæма цæуы. Схуыдтой сæ Аня æмæ Машæ. Ног бынаты адаптаци кæнынц. Ахуыр кæнынц Волгограды æнтæф сæрдыл. Бацæттæ сын кодтой бассейнимæ апартаменттæ.
Адæмыл лæппынтæ сахуыр сты – уазджытыл æхсызгонæй æмбæлынц. Уый иуæй хорз у, иннæмæй та ахæм цæрæгойты фæстæмæ æрдзмæ ауадзын æдас нæу, зæгъынц специалисттæ.
Фыццаг хатт адæмы къухтæм бахаудысты Цæгат Ирыстоны – мæллæг æмæ тарстæй. Волонтерты хъуыдымæ гæсгæ, сæ мад амардис. Хъæддаг сырдты ирвæзын кæныны æмæ реабилитацийы центр «Дино»-йы лæппынты æрбацыдмæ лæмбынæг цæттæ кодтой, сарæзтой сын æппæт хъæугæ уавæртæ. Æрсытимæ кусыны хъуыддаджы сæм стыр фæлтæрддзинад ис.
Центр «Дино»-йы куыст ахадгæдæр кæны. Фылдæр кæны цæрæгойты нымæц. Аразынц сын уæрæх вольертæ, цæст дарынц се нæниздзинадмæ æмæ хæрын кæныны хъуыддагмæ.
Абон центры ис 9 арсы. Хæстæгдæр рæстæг сæ нымæц фæфылдæр уыдзæн. Ныридæгæн куыст цæуы гæнæнтæ фæпарахатдæр кæныныл. Центры разамынд цы туристон проектыл бакуыста «Бурый медведь – символ Великой России», уый æххуыс райста федералон æмвæзадыл. Фæрæзты фылдæр хай æрвыст æрцыд æрсытæн нырыккон парк саразынæн. Ацы хъуыддаг æххæст кæнын райдыдтой – комплекс хъуамæ Уæрæсейы Хуссар хайы суа æппæтæй стырдæр.
