Тугдадзинты хирург, нейрохирург, медицинон психолог, травматолог-ортопед æмæ эндокринолог 2 боны кусынц Дзæуджыхъæуы
Уæрæсейы федералон медикон-биологон агентады специалисттæ кæнынц консультацитæ Цæгат Ирыстоны. Тугдадзинты хирург, нейрохирург, медицинон психолог, травматолог-ортопед æмæ эндокринолог 2 боны кусынц Дзæуджыхъæуы. Раздæр сбæлвырд кодтой 200 адæймаджы æнæниздзинад Мæздæджы. Бæлвырддæр радзурдзæн Хъайтмазты Дзерассæ.
Андиаты Марат хъаст кæны сæры рыстæй. Тыхсын æй кæнынц ныр 8 азы. Фыццаг æнцондæр уыд, фæлæ уый фæстæ йæ уавæр фæуæззаудæр.
Марат йæхи 2 хатты дзæбæх кодта. Уавæр фæхуыздæр. Фæлæ йын фæстæдæр сæвæрдтой диагноз – «гидроцефалия». Сæры магъзы бирæ сæмбырд вæййы астæуыстæджы магъзы донгъæд. Медицинон хатдзæг сфидар кодта æмæ сдзæбæх уæвыны ныфс Марат райста Мæскуыйы 85-æм рынчындоны нейрохирургмæ æркасты.
Ацы специалистмæ æрбацыд Сергей Авагимов дæр. У сæрмагонд æфсæддон операцийы ветеран. 2022-æм азы батальон «Алани»-йы хыгъды Запорожьейырдыгæй æххæст кодта хæстон хæстæ. Уыцы аз ноябры уæззау цæф фæцис – йæ къæхтæ 16 раны саст æмæ нуар аскъуыд. Ныртæккæ йын алы азмæлд скæнын дæр зын у.
Консультацитæ кæнынц Уæрæсейы федералон медикон-биологон агентады специалисттæ. Се хсæн тугдадзинты хирург, нейрохирург, медицинон психолог, травматолог-ортопед æмæ эндокринолог. Цæгат Ирыстоны сты дыккаг хатт. Дзæуджыхъæуы кусынц 2 боны. Раздæр сбæлвырд кодтой 200 адæймаджы æнæниздзинад Мæздæджы.
Консультацитæ цæуынц 1-æм поликлиникæйы Фыдыбæстæйы хæстонты бинонты комитеты курдиатмæ гæсгæ. Стыр æргом здахынц сæрмагонд æфсæддон операцийы архайджытæм æмæ сæ бинонтæм.
Мæскуыйы рынчындоны ис сæрмагонд хайад регионтимæ æмархайды фæдыл.
Æркаст цæуы 3 боны. Ахæм кусæг балцытæ специалисттæ фæнд кæнынц 6 мæйы иу хатт æххæст кæнын.
