Сæ куысты тыххæй радзырдтой профилон конференцийы
Цæгат Ирыстоны паддзахадон университеты лабораторийы ахуыргæндтæ кæнынц ног иртæстытæ. Сæ куысты тыххæй радзырдтой профилон конференцийы. Цæгат Ирыстойнаг ахуыргæндты иртæстыты руаджы хъуамæ сбæрæг уой дзæбæх кæныны ног методтæ. Бæстондæр радзурдзæн Чехойты Фатимæ.
Чысыл тугдадзинтæ иртасæн ис ныхмæ хæстæг æнгуылдзы хайыл дæр. Ам буары цъармæ сты хæстæг, уымæ гæсгæ ахуыргæндтæ сæрмагонд аппараты руаджы сбæрæг кæнынц туджы цыд æмæ йæ бæрц. Бæрæггæнæнтæ раст сты æви нæ, уый иртæстыты размæ базонын бафæлварынц лабораторон цæрæгойтыл.
Ревматоидон артрит æрмæст счытыл нæ бахæцы, фæбæрæг вæййы зæрдæйыл дæр. Иугæндзон низ фæкъуылымпы кæны тугдадзинты куыст, свæййы низы фæкарзы аххоссаг. Цæгат Ирыстоны паддзахадон университеты ахуыргæндтæ иртасынц, бичъы туджы чырæгтæ буар хъахъхъæнынц ахæм фæстиуджытæй æви нæ, уый. Уый тыххæй низ бахæссынц лабороторон цæрæгойты буæрттæм, афтæмæй раиртасынц, тугдадзинты чырæгты терапийы фæстæ цы ивддзинæдтæ *рцæуы, уый.
Чырæгты хуылфы иртасынц, митохондриты — буары сæрмагонд энергетикон станцæты куыст. Уыдон æххуыс кæнынц, чырæгтæ ивддзинæдты рæстæг сæхи куыд фæдарынц, стæй ахæм терапийы руаджы цавæр процесстæн гæнæн ис, уый. Микроскоппæй кæсгæйæ, ахуыргæндтæ иртасынц, ревматикон низтæ дзæбæхгæнгæйæ, цы хостæй спайда кæнынц, уыдон счыты магъзы чырæгтыл куыд фæбæрæг вæййынц ,уый. Ахсджиаг у æрмæст тугдадзинтæ бахъахъхъæнын æмæ низ бауромын нæ, фæлæ сбæлвырд кæнын, æнæ дохтырæй хи дзæбæх кæнын куыд тæссаг у, уый. Ахуыргæндтæ эксперименты хуызы спайда кæнынц бичъы туджы сæрмагонд чырæгтæй. Сбæлвырд кæнынц, уыдон тугдадзинтæ хъахъхъæнынц æви нæ, æмæ ма афтæмæй ревматоидон артриты фæкарзæй тæссаг вæййы æви нæ, уый дæр.
Цæгат Ирыстоны паддзахадон университеты лабораторийы хистæр зонадон кусæг Дзампаты Жаннæ йæ куысты хатдзæгтæ равдыста Санкт-Петербурджы ревматологийæ æппæтадæмон конгрессы. Иртасæн сси ноджыдæр ма иу къахдзæф ревматикон низтæ дзæбæх кæныны процессы. Ныр ахуыргæндтæ фæнд кæнынц сæ куыст дарддæр ахæццæ кæнын æмæ сæ къабазы дохтыртимæ æмгуыстад парахат кæнын, цæмæй сæ иртæстытæй пайдагæнæн уа практикон æгъдауæй.
Чырæгты терапийæ клиникон практикæйы спайда кæныны размæ хъæуы ацæуын иртасæнты цалдæр къæпхæны. Цæгат Ирыстоны паддзахадон университеты ахуыргæндтæ агурынц, ревматикон низтæй дзæбæх кæнынæн пайдадæр чи уыдзæн, ахæм методтæ.
