Процедурæ йæхæдæг та донорæн тæссаг æппындæр нæу
Стæджы магъзы чырæгтæ астæуыхъæдæй нæ исынц, фæлæ тугæй. Процедурæ йæхæдæг та донорæн тæссаг æппындæр нæу. Уыцы хъуыды адæмы хсæн апарахат кæныны тыххæй нæ республикæмæ ссыдысты Уæрæсейы медицинон-биологон агентады Цæгат Кавказы федералон наукон-клиникон центры специалисттæ. Рухстауæн лекцитимæ раныхас кодтой Цæгат Ирыстоны 6 ахуыргæнæндоны. Ахсджиаг фембæлды ма архайдтой хæрзаудæн фонд «Быть добру»-йы разамонæг Хъуысаты Амырхан, паддзахадон телерадиокомпани «Алани»-йы сæрмагонд уацхæссæг Наталья Фрейберг. Куыд ма уын æй хъусын кодтам, афтæмæй не мкусæг 7 азы размæ сси стæджы магъзы донор, æмæ афтæмæй аирвæзын кодта адæймаджы цард. Фембæлды хатдзæгтæм гæсгæ 50 æрыгон адæймаджы бахастой фæндон, донор суæвыны тыххæй. Сты Хæххон паддзахадон аграрон университеты, Цæгат Кавказы хæххон металлургон институты, финансон колледжы, медицинон академийы, медицинон колледжы æмæ Цæгат Ирыстоны паддзахадон университеты студенттæ.
Стæджы магъзы донорты регистрмæ бацæуыны фадат ис алы адæймагæн дæр. æрмæст сыл хъуамæ цæуа 18 азæй 35 азы онг. Трансплантацийы процедурæ хуымæтæг туг раттынæй цæхгæр нæ хицæн кæны. Хъæуы йыл фылдæр рæстæг схардз кæнын, æмæ раздæр дохтырты бæстон æркаст ацæуын. Дунейы уавæр карз кæй у, уымæ гæсгæ уæззау низтæй рынчын адæмæн, раздæр куыд уыди, афтæ фæсарæйнаг граждантæй доноры æххуыс райсын æнцон хъуыддаг нæу. Уымæ гæсгæ стæджы магъзы донорты уæрæсейаг регистр хъæуы æххæст кæнын. Специалисттæ фæнд кæнынц ахæм рухстауæн акцитæ дарддæр дæр аразын.
