Цæгат Ирыстонмæ Норильскæй æрыздæхтысты Цæгат Кавказы хæххон-металлургон институты студенттæ
Ацы бонты Цæгат Ирыстонмæ Норильскæй æрыздæхтысты Цæгат Кавказы хæххон-металлургон институты студенттæ.
Уым арæзтадон къорд куыста æфсæнвæндаджы цалцæгыл. Æдæппæтæй Норильскмæ
ацыд 80 студенты. Фесты дзы 4 мæйы. Сæхи тынг хорз кæй равдыстой, уый
тыххæй сын бузныг загътой институты разамынд, сæ ахуыргæнджытæ.
Парламенты, стæй æхсæнадон организаци «Уæрæсейы арæзтадон къордты» номæй
студенттæн раарфæ кодта Таболы Тамарæ. Уæвгæ, уæлдæр ахуыргæнæндоны
ахæм практикæйæ арæх пайда кæнынц.
Таболты Тамарæ, æхсæнадон организаци
«Уæрæсейы арæзтадон къордты» регионалон хайады разамынды сæрдар: «Тынг
хорз фæсивæд нæм ис, нæ хъару сты æмæ æнæхъæн сæрд фæкуыстой къордтæй
Уæрæсейы горæтты – Норильскы, Мæскуыйы, Екатеринбурджы. Тынг хорз
бакуыстой æмæ нæ зæрды ис, цæмæй афæдзæй афæдзмæ ахæм æрыгæттæ фылдæр
уа, Ирыстонæй кусынмæ чи цæуы, æмæ хæдзармæ куыд æрбаздæхой дзæбæхæй,
æнæнизæй».
Гæбæраты Ирбег, Цæгат Кавказы хæххон
металлургон институты рауагъдонтæн куыст агурыны центры директор: «Сæхи
равдыстой тынг хорз, нæхи нæ фæхудинаг кодтам, цы хæстæ æвæрд ныл уыд,
уыдон сæххæст кодтам. Архайдтам культурон хъуыддæгты, спорты, уым дæр
нæхи равдыстам. Куыстой æфсæнвæндагыл, цалцæг æй кодтой, цæттæ йæ кодтой
зымæгмæ, уымæн æмæ æнæ уыцы фæндаг уым гæнæн нæй».
Засеты Игорь, арæзтадон къорды уæнг: «Мæ
зæрдæмæ тынг фæцыдис, ардыгæй нæ куы ‘рвыстой, уæд нын загътой, уæззау
куыст уыдзæнис, фæлæ уæддæр бафæрæзтам 4 мæйы, цæмæй ахуыргæнæндоны кад
уæлдæрæй уæлдæр исæм. Кæд ма гæнæн уа, уæд æнæмæнгæй ацæудзынæн. Тынг
хорз дзы уыдис. Иууылдæр иумæ цардыстæм, иу бинонты хуызон».
