Цæгат Ирыстонмæ Мæскуыйæ ссыдысты академик Святослав Федоровы ном хæссæг клиникæ «Микрохирургия глаза»-йы специалисттæ. Уыдон бæрæг кæнынц сывæллæтты æнæниздзинады уавæр.
Цæгат Ирыстонмæ Мæскуыйæ ссыдысты
академик Святослав Федоровы ном хæссæг клиникæ «Микрохирургия глаза»-йы
специалисттæ. Уыдон бæрæг кæнынц сывæллæтты æнæниздзинады уавæр. Рынчын сабиты ныййарджытæн кæнынц консультацитæ. Сæ фæлтæрддзинадимæ зонгæ кæнынц Ирыстойнаг дохтырты дæр.
Æрмæст
иу бонмæ мæскуыйаг специалисттæ сбæрæг кодтой 50 сывæллоны
æнæниздзинад. Цæгат Ирыстоны дохтыртимæ иумæ равзæрстой хуыздæр
дзæбæхгæнæн методикæ. Куыд рабæрæг, афтæмæй æххуысхъуаг сывæллæттæ
Ирыстоны бирæ ис. Райсомæй раджы бацахсынц рад, цæмæй сæ сывæллæтты
фенын кæной дохтыртæн.
Клиникæйы специалистты ныхæстæм гæсгæ,
сывæллоны цæстытæм бакæсгæйæ, рабæрæг вæййынц, цы экологон уавæрты
цæры, йæ ныййарджытæй йæм фæхæццæ низ æви нæ, уый æмæ ма æндæр фарстатæ.
Æппæт уавæртæ æмæ аххоссæгтæ хынцгæйæ, бынæттон дохтыртимæ рахæссынц
уынаффæ, сывæллоны куыд хуыздæр сдзæбæх кæнæн ис, уый тыххæй.
Æппæтæй арæхдæр та сывæллæттæм æмбæлынц астигматизм, зылынцæст,
хæстæгдзастдзинад, калабома, катаракта, врожденная глоукома кæй хонынц,
уыцы низтæ. Хъыгагæн, рынчын сабиты нымæц азæй азмæ кæны фылдæр.
Мæскуыйаг специалистты хъуыдымæ гæсгæ, бынæттон дохтыры фæлтæрдзинад æмæ
зонындзинæдтæн ма æмбæлгæ медицинон кусæнгæрзтæ куы уаид, уæд сæ
нымайæн уаид хуыздæр клиникæтыл.
Бафиппайын хъæуы, мæскуыйаг дохтыртæ нæ республикæмæ ссыдысты 4-æм хатт.
Уымæй размæ ам уыдысты, сывæллæтты церебралон паралич æмæ онкологон
низтæ чи дзæбæх кæны, ахæм специалисттæ, стæй фтизиатртæ. Дохтыртæ
республикæмæ ссæуынц Уæрæсейы Президенты цур Цæгат Ирыстоны минæварады
проектмæ гæсгæ.
Зыхъуаты Жаннæ
