Ног хъарутæ æмæ ног спектакльтимæ сæмбæлдысты аивадуарзджытыл. Ныридæгæн уал таетрдзутæ федтой Годжысаты Исахъы пьесæмæ гæсгæ æвæрд спетакль «Хъæддаг чызг». Йæ режиссер у Сæбанты Тамерлан.
Ног хъарутæ æмæ ног спектакльтимæ
сæмбæлдысты аивадуарзджытыл. Ныридæгæн уал таетрдзутæ федтой Годжысаты
Исахъы пьесæмæ гæсгæ æвæрд спетакль
«Хъæддаг чызг». Йæ режиссер у Сæбанты Тамерлан. Премьерæ федта не
сфæлдыстадон къорд дæр.
Куыд алы аз, афтæ та ныр дæр, æгъдаумæ
гæсгæ Ирон театры артисттæ ног 77-æм сезон байгом кодтой иууылдæр иумæ.
Рæсугъд ныфсытимæ æмæ ног хъуыдытимæ сæмбæлдысты театрдзаутыл. Сезон
байгом кодтой премьерæйæ – Годжысаты Исахъы пьесæмæ гæсгæ æвæрд
спектакль «Хъæддаг чызг».
Гуыбиаты Хъазыбег, Ирон театры аивадон
разамонæг: «Мах ацы спектакльæй арæм Годжысаты Исахъы ном – йæ сыгъдæг
ном, йæ рухс ном. Уымæн æмæ уыдис сыгъдæг адæймаг, рухс адæймаг æмæ стыр
актер. Æмæ уымæ гæсгæ нæ сезон байгом кодтам ацы спектаклæй».
Спектаклы режиссер у Уæрæсейы Федерацийы
сгуыхт æмæ Цæгат Ирыстоны адæмон артист Сæбанты Тамерлан. Куыд зæгъы,
афтæмæй пьесæ абон дæр у актуалон.
Сæбанты Тамерлан, режиссер:
«Раздæхтыстæм æм уымæн æмæ дзы ис зæрдæйы чи хизы, уыцы æнкъарæнтæ,
уымæн æмæ дзы ис зæрдæ чи агайы, ахæм хъуыдытæ. Æмæ снысан кодтам
нæхицæн ацы пьесæ. Уæлдай æхцон та нын уый у, æмæ Исахъ кæй ныффыста ацы
пьесæ. Йæхæдæг куыд фæлмæнзæрдæ адæймаг уыдис, пьесæ дæр дзуры ахæм
адæймагыл».
Сæйраг рольтæй иу ахъазыд Уæрæсейы
Федерацийы сгуыхт æмæ Цæгат Ирыстоны адæмон артист Хуыгаты Сурен.
Хъæддаг чызджы сурæт та сценæйыл сарæзта Цæгат Ирыстоны паддзахадон
университеты аивадон факультеты рауагъдон Дзлиаты Дæринæ. Спектаклы ма
хъазынц Цæргæсты Дзамболат, Гæбуты Жаннæ, Къуымæллæгкаты Владимир,
Мыртазты Тимур, Черчесты Дианæ, Медойты Светланæ.
Медойты Светланæ, РЦИ-Аланийы адæмон
артисткæ: «Кæимæ куыстон, уыдонæн дæр бузныг зæгъын. Хуыцау зæгъæд, æмæ
ма ноджыдæр хорз спектакльтæ куыд кæнæм, мæнæ адæмæн зонындзинæдтæ куыд
хæссой. Ацы спектаклы дæр ис алы фæлтæрæн дæр зонындзинæдтæ».
Черчесты Дианæ, РЦИ-Аланийы адæмон
артисткæ: «Годжысаты Исахъ ацы пьесæ абон нæ ныффыста, фæлæ куыд
рауадис, афтæмæй, æвæццæгæн ирон классикæмæ бахаудзæнис. Æмæ дзы цы
хъуыддагыл дзырд цæуы, уый у алыбоны проблемæ».
Ацы театралон сезонмæ ма артисттæ
бацæттæ кодта цалдæр ног спектаклы. Айларты Асæхмæты пьесæ «Амынæт»,
Джыккайты Шамилы «Хъодыгонд зæд»-ы, спектакльтæ сабитæн. Æмæ ма
театрдзаутæн уарзон чи у, уыцы спектакльтæ «Цола», «Ревизор», «Тартюф».
Гугкаты Иринæ
