Тугъанты Махарбеджы номыл музейы байгом Цæгат Ирыстоны сгуыхт нывгæнæг, Уæрæсейы аивæдты академийы кадджын уæнг Козаты Ушангы сæрмагонд равдыст. Арæзт у, нывгæнæгыл 60 азы кæй сæххæст
Тугъанты Махарбеджы номыл музейы байгом
Цæгат Ирыстоны сгуыхт нывгæнæг, Уæрæсейы аивæдты академийы кадджын уæнг
Козаты Ушангы сæрмагонд равдыст. Арæзт у, нывгæнæгыл
60 азы кæй сæххæст, уый кадæн. Аивадуарзджытæ федтой, æрдзы нывтæ кæм и,
ахæм 30 куыстæй фылдæр.
Козаты Ушангы сфæлдыстад раджы ссардта
фæндаг аивадуарзджыты зæрдæтæм. Йæ ном æнæзонгæ нæу дунейы бирæ бæстæты.
У бирæ хæрзиуджыты хицау. Специалистты ныхæстæм гæсгæ, йæ куыстытæ
хицæн кæнынц иннæтæй. Ис сæ цавæрдæр хъарм, гуырын кæнынц хорз
æнкъарæнтæ, адæймаджы бауадзынц ныфс. Уый та, æвæццæгæн, уымæн, æмæ
автор йæхæдæг дæр у цæрдуарзон.
Цард доны къусæй уæлдай нæу, фæзæгъынц.
Козаты Ушанг дæр йæ царды бирæ федта æмæ бавзæрста. Бахъуаджы сахат
райста хæцæнгарз дæр æмæ йæхæдæг архайдта Хуссар Ирыстоны хæстон цауты.
2008 азы йын лæвæрд æрцыд «Хуссар Ирыстоны хъæбатыры» ном. Хæцыд
æфсымæрон республикæ Абхазы дæр. Ныр дæр ма йæ бирæтæ бафæрсынц – куыд
баиу сты нывгæнæг æмæ салдат?…
Козаты Ушангы нывты ирдæй зынынц, йæ
зæрдæмæ хæстæг кæй айста, уыцы цаутæ. Хъæрмæдоны фыдбæллæх, Беслæны
теракт æмæ æндæртæ. Сты символикон, сæ мидис æмбарын кæнынц сæхи æгомыг
æвзагæй. Сæйрагдæр та уый у, æмæ нæ алыварс дуне авгæй уæлдай нæу, æмæ
йæ хъæуы хъахъхъæнын æмæ уарзын. Аивадон училищæйы студенттæн цы
кисточкæтæ балæвар кодта – уый дæр схонæн ис символиконыл. Иуæй æрыгæттæ
дарддæр хæццæ кæндзысты æмæ хъахъхъæндзысты ирон нывкæнынады æгъдæуттæ.
Иннæмæй та сæм, чи зоны, æмæ фæхæццæ уыдзæн нывгæнæг æмæ патриот –
Козаты Ушангы курдиаты цæхæр дæр.
Зыхъуаты Жаннæ
