Абайты Васойы номыл Цæгат Ирыстоны гуманитарон æмæ социалогон иртæстыты институты абон байгом уыдзæн æрыгон ахуыргæндты регионалон конференци «Наукæ-æхсæнадæн». Йæ нысан у, ацы аз æрыгон ахуыргæндты къухы цы бæрæггæнæнтæ бафтыд
Абайты Васойы номыл Цæгат Ирыстоны
гуманитарон æмæ социалогон иртæстыты институты абон байгом уыдзæн
æрыгон ахуыргæндты регионалон конференци «Наукæ-æхсæнадæн». Йæ нысан у,
ацы аз æрыгон ахуыргæндты къухы цы бæрæггæнæнтæ бафтыд, уыдоны тыххæй
радзурын, фæсивæды *ргом наукон-иртасæн куыстмæ раздахын, æрыгон
ахуыргæндты раныхæстæй хуыздæры сбæрæг кæнын.
Ахуыргæнджыты зонындзинæдтæ бæрзонддæр кæныны институты та ацыд фыццаг дæрддзæфмæ арæзт урок ирон æвзагыл.
Йæ архайджытæ уыдысты Цæгат æмæ Хуссар
Ирыстоны скъолаты ахуырдзаутæ. Инетрнеты иумæйаг тыгъдадмæ рацыд не
сфæлдыстадон къорд дæр.
Цæгат Ирыстоны ахуырад æмæ наукæйы
министрады информацион технологиты сæрдар Сæлбиты Алан бæстонæй иртасы
цæгат æмæ Хуссар Ирыстоны скъолаты техникон цæттæдзинад иумæйаг гом
урочы архайынмæ куыд цæттæ у уый, æмæ куыннæ.Цæгат Кавказы ахæм
интерактивон урок у фыццаг.
Сæлбиты Алан, Наукæ æмæ информацион
технологиты хайады хицау: «Абон мах цы куыст бакодтам, уыцы куыст у
егъау, бæркадджын. Цæй фæдыл? Цæгат Ирыстоны специалисттæ скодтой
системæ æмæ йæхи равдыста хæрзхъæдæй. Йæ фæрцы нæ бон архайын у
дистанцион ахуырады. Ирон адæм йæ фæрцы кæрæдзиимæ æнгомдæр баст
уыдзысты».
Дистанцион ахуырады архайдтой 140
скъолайæ фылдæр. 5-æм æмæ 6-æм кълæсты ахуырдзаутæ ныхас кодтой Коцойты
Арсены фыст уацмыстыл. Радзырд «Саломи»-йы бындурыл сывæллæттæ раргом
кодтой «Лæгдзинады æмæ рæсугъд удыхъæды зарæджы» темæ. Амыдта йæ нæ
республикæйы сгуыхт ахуыргæнæг Дзарасаты Беллæ.
Дзарасаты Беллæ, РЦИ-Аланийы сгуыхт
ахуыргæнæг, Елхоты 2-æм скъолайы ирон æвзаг æмæ литературæйы ахуыргæнæг:
«Мах ирон адæм нырыккон технологитимæ æмдзу кæнын кæй фæразæм, уымæй æз
дæн тынг сæрыстыр. Стæй мæм ахæм кадджын хæс кæй æрхаудис, уыдонæн
æскæнын урок, уымæй та æз мæхи нымайын уæлдай амондджындæр. Фæлæ цыфæнды
раззагдæр технологитæй æппæты бæрзонддæр æвæрын æз адæмы иудзинад æмæ
нæ ахæм уавæртæ уымæн хъæуынц, цæмæй уыцы хæлардзинады тæгтæ арфдæр
кæной. Æмæ кæд мах дыууæ Ирыстоны кæрæдзимæ афтæ арæх не фтæм, уæд ахæм
уырочыты руаджы арæхдæр ис æмбæлæн».
Гом дистанцион урок арæзт æрцыд дыууæ
республикæты ахуырады æмæ наукæйы министрæдты хъæппæрисæй. Наукæ æмæ
информацион технологиты хайады хицау Сæлбиты Алан куыд загъта, афтæмæй,
нырыккон технологиты руаджы дыууæ республикæйы сывæллæттæ иумæ сæ
зонындзинæдтæ фылдæр кæной, уый сын бантыст. Дарддæр та архайдзысты
иумæйаг информацион тыгъдадмæ рацæуын æндæр бæстæты цы ирæдтæ цæры
уыдонимæ дæр. Ахæм фæнд фæзынд скъоладзаутæм дæр.
Хугаты Алинæ: «Мæн фæнды иннæ бæстæтимæ дæр ахæм урочытæ куыд цæуой».
Сæлбиты Алан, Наукæ æмæ информацион
технологиты хайады хицау: «Ацы азы кæронмæ уыцы хъуыддаг лыггонд
æрцæудзæн æмæ скæндзыстæм гом урок æппæт зæххы къорийыл, кæм цæрынц ирон
адæм, уыдонимæ бирæтимæ махæн ис бастдзинад æмæ уыцы урок æнæмæнг конд
æрцæудзæн хæстæгдæр рæстæг».
Уыцы рæстæгмæ та уал бакусын хъæуы цæмæй
интернеты фæрцы урочытæ цæуой сеппæт скъолаты дæр, уæлдайдæр та хохаг
хъæуты æмæ афтæмæй иумæйаг ахуырады æмвæзад фæбæрзонддæр кæнын.
