Йæ фæллойадон æмæ сфæлдыстадон фæндаг райдыдта Цæгат Ирыстоны радиойы Хæдзары, бакуыста телеуынынады редакцийы, журнал «Ногдзауы» æмæ «Мах дуджы».
Фыссæг, Цæгат Ирыстоны телерадиокомпанийы журналист, журнал «Ногдзау»-ы бæрнон секретарь, «Мах дуджы» сæйраг редакторы хæдивæг æмæ фысджыты цæдисы уæнг Агънаты Гæстæн цы бынаты куыста, уым архайдта æмæ архайы æхсæнадон цард айдæнау æвдисыныл.
Агънаты Гæстæн, РЦИ-Аланийы адæмон фыссæг: «Фæстаг 3 азы фыстон æмæ ныффыстон иу роман æмæ фарон журнал «Мах дуджы» рацыдис цыбыргондæй «Темыры кæстæр чызг» Мæн фæндыдис зæгъын нæ абоны царды тыххæй. Цы у нæ цард, цавæр æхсæнады цæрæм æмæ уыцы æхсæнад ирон бинонтыл куыд фæбæрæг. Æмæ мæнмæ гæсгæ дзы ис бирæ æвзæр, чъизидзинæдтæ. Æз цы бинонты кой кæнын уыдон сты алыхуызæдтæ».
Гæстæн райгуырд Хъарман-Сындзыхъæуы 1943-æм азы. Йæ сабийы бонтæ бæллиццаг нæ уыдысты, уымæн æмæ хæствæллад адæм сæ цоты хæссынæй фæстæмæ ма архайдтой цард аразыныл, уый та æнцон нæ уыд. Æмæ Гæстæн йæ размæ сæвæрдта хæс, адæмы цард æвдисын, сæ миддунемæ сын ныккæсын æмæ йын бантыст. Скъолайы фæстæ сси Мæскуыйы Горькийы номыл литературон институты студент. Уый фæстæ куыста радиойы уацхæссæгæй, телерадиокомпанийы литературон драмон редакцийы хистæр редакторæй. Адæм цымыдисæй æнхъæлмæ кастысты йæ равдыстыты циклмæ «Зæрдæйæ зæрдæмæ». Уыцы иу рæстæг кодта литературон иртасæн куыст дæр æмæ йæ радзырдтæ æмæ уацаутæ фæндаг ссардтой адæмы зæрдæмæ.
Къадзаты Станислав, поэт, телерадиокампани «Алании»-йы редактор: «Радиожурнал «Уацамонгæ арæзтам» æмæ уым уыдис уаазæг Æрыдонæй, Айларты Женя æмæ уый Гæстæнæн цы арфæтæ фæукодта, уымæ байхъусын хъуыди. Æмæ æрмæст уымæн дæр хъæуы цæрын».
Агънаты Гæстæнæн æрæджы рацыд чиныг «Знон æмæ абон». Уым Ирыстоны зындгонд адæм иртасынц йе сфæлдыстадон куыст. Чиныг райсгæйæ æмæ йæ сыфтыл афæлгæсгæйæ нæ цæст æрхæцыд Тыджыты Юрийы хъуыдыйыл Гæстæнæй зæгъы афтæ: «Йæ уацмыстæ не сты тæнæг цæугæдонау хъæлæбагæнæг. Уыдон гуырынц зынæй, фæлæ царды рæстдзинады денджызæй».
Къадзаты Станислав, поэт: «Йæ фыццаг цин та кæддæриддæр уыдис нывæфтыд ныхас. Æмæ нывæфтыд ныхасæн цы лæггæдтæ бакодта, дзырдвидыцы бардуагæн цы хæрзты бацыд, уымæн æвдисæн адæмын йæ уацмыстæ кæй райстой æмæ сæ кæй кæсынц, уый».
«Фыссæгæн йæ азтæ уæззау уаргъ никуы уыдысты», йæ 70 азы сæрты акæсгæйæ зæгъы Агънаты Гæстæн. Бирæ фæндтæ йæм ис фидæнмæ æмæ йæ къухы кæй бафтдзысты, ууыл æууæнды. Уымæн æмæ йын йæ тыхыл тых æфтауынц йæ фæрнджын бинонтæ, йæ хъæбулы хъæбултæ Агундæ æмæ Давид.
Моргуаты Ладæ
