Ацы бонты нæ республикæйы мысынц фыццаг ирон оперон режиссеры, Цæгат Ирыстоны оперæ æмæ балеты паддзахадон театры бындурæвæрæг æмæ аивадон разамонæг Лекъты Юрийы.
Уæрæсейы адæмон артист, Цæгат Ирыстоны аивæдты сгуыхт кусæг сценæйы сæвæрдта 70 фæсарæйнаг æмæ уырыссаг классикон оперæйы. Лекъты Юрийы руаджы аивадуарзджытæ федтой ирон композиторты уацмыстæ дæр. Зындгонд оперон режиссер каст фæци Киевы театралон аивæдты институт. Куыста Киевы, Харьковы æмæ Одессæйы оперæ æмæ балеты театрты. 1977-æм азы Цæгат Ирыстоны разамынд Лекъты Юрийы æрбахуыдта нæ республикæмæ. Уымæ гæсгæ, йæ номимæ баст у паддзахадон музыкалон театры райрæзт. У фыццаг ирон оперæ «Азау»-ы режиссер.
Хъабанты Тамарæ, РЦИ-Аланийы адæмон артисткæ: «Юрий Николаевич фыццаджыдæр уырыссаг æмæ Европейаг оперетте æвæргæйæ, йе здæхт уыдис националон оперæмæ, йе взагмæ, йæ мидисмæ, йæ музыкалон мидисмæ. Уый диссаджы рæстæг уыдис. Æмæ æвæццæгæн ахæм рæстæджы райгуырынц æмæ фæкусынц ахæм адæм. Æмæ сæм адæм дæр æнхъæлмæ кастысты, Ирыстон сæ буц кодта».
