Йæ режиссер у Сечъынаты Элитæ. Йæ ныхæстæм гæсгæ сывæллæттæн спектакль фыццаг хатт нæ сæвæрдта, фæлæ алы хатт дæр йæ куыстмæ бавналы разæнгардæй, уымæн æмæ сабитæ сты æргомзæрдæ, сыгъдæг.
Сечъынаты Элитæ режиссеры куысты йæхи фыццаг хатт нæ бафæлвæрдта. Фæлæ йæм алы хатт дæр кæсы цымыдисаг. Уæвгæ, сабитæн спектакль сæвæрын иуæй æнцон у, иннæмæй та зын. Уымæн æмæ сæ асайæн нæй, сты æргомзæрдæ, сыгъдæг. Спектаклы рæстæг семæ иумæ кæй фæархайынц, уый та уæлдай зæрдæмæдзæугæ вæййы.
Сечъынаты Элитæ, РЦИ-Аланийы сгуыхт артискæ: «Æз тынг уарзын сывæллæттæн ахæм аргъæуттæ æвæрын. Цымыдис вæййы семæ кусын. Стæй сæхæдæг дæр кæй фæархайынц сценæйы, уый дæр хорз у. Ахуыр кæнынц хорзыл, цин кæнынц, æмбарынц хорз æмæ æвзæр цы у, уый».
Дыгурон драмон театр сывæллæттæн бацæттæ кодта ног спектакль «Алæмæты хъæды аргъæуттæ». Æрбахуыдтой йæм сидзæр сывæллæтты хæдзæртты хъомылгæнинæгты æмæ горæты скъолаты ахуырдзауты. Иууылдæр æвдисæн фесты, тæмæссаг хъæды цы цаутæ цæуынц, уымæн. Æнæнхъæлæджы цымыдисаг уыдысты хъæды цæрджытæ дæр, æнахуыр бæлæстæ, дисы фтауæг цъай.
Ацы хатт сывæллæттæ аргъауы хъайтартимæ Къулыбадæг усы æмæ хæйрæджы уацарæй фервæзын кодтой Митын Дадайы. Æмæ уæд иууылдæр цин кодтой ног бонтыл, алæмæты дунейыл, бæрæгбоныл. Уый та фæцæуы сывæллæтты зæрдæмæ дæр, артисттæн дæр вæййы æхсызгон.
Мæргъиты Батраз: «Аргъау мæ зæрдæмæ тынг фæцыд. Тынг хъæлдзæг дзы уыд, бирæ зарджытæ. Мæ зæрдæмæ фæцыд Дед Мороз дæр, Снегурочкæ дæр. Сценæйы куыд хъазыдысты, уый дæрм æ зæрдæмæ фæцыд». Хъайтмазты Сослан: «Мах æрбацыдыстæм ардæм æмæ йыл æппындæр нæ фæфæсмон кодтон. Æз уарзын театрмæ цæуын. Ацы хатт дæр актертæ куыд хъазыдысты, куыд зарыдысты, уый мæ зæрдæмæ фæцыд».
Золойты Хъазыбег, сидзæр сывæллæтты хæдзар «Виктория»-йы ахуыргæнæг: «Ацы бæрæгбон сывæллæттæн арæзт æрцыд, æмæ мæм уый хорз кæсы. Æгайтма, нæ сывæллæттæн циндзинад хæссынц, æрбахонынц сæ театрмæ. Уыдонæнæ дæр сæ зæрдæтæмæ цæуы, уарзынц ардæм цæуын».
Дыгурон драмон театрмæ чи рбацыд, уыдон уыдысты иу хъуыдыйыл хæст. Ахæм мадзæлттæ сывæллæттæн арæхдæр куы аразиккой, уæд уаид хуыздæр.
Зыхъуаты Жаннæ
