Бæрæгбоны кадæн куыстуаты уыд гом дуæртты бон. Заводы хуыздæр кусджыты схорзæхджын кодтой паддзахадон хæрзиуджытæй. Юбиляртæн раарфæ кодта не сфæлдыстадон къорд дæр.
Цыбыр рæстæгмæ æфсæйнаджы чысыл гæбазæй дæсны куырды къухты рауайдзæн, вагæттæ кæрæдзиимæ чи бæтты, ахæм гуыдыр. 42 азмæ ахæм хæйттæ Къæбулты Эдуард сæдæгæйттæ бацæттæ кодта. Вагæттæ цалцæггæнæн заводмæ йæ æрбакодта йæ фыд, 23 азы йыл куы цыдис, уæд. Ам куыстой йæ 2 хистæр æфсымæры дæр. Уæдæй фæстæмæ Эдуард кусы куырдадзы.
Къæбулты Эдуард, куырд: «Абоны бонмæ фæсмон нæ кæнын. Æрмæстдæр мæ фæнды бакусын. Чи мæ ахуыр кодта, уый бакуыста 50 азы, мæн дæр фæнды, цæмæй бакусон 50 азы. Мæ ахуыргæнæг мын загъта, æз цы бакуыстон, ды дæр уый бæрц бакус. Мæн фæнды уыцы хъуыддаг ахæццæ кæнын».
Заводы 100 азы бæрæг кæныны бон куыстуаты дуæрттæ гом сты се ппæтæн дæр. Цæлхыты цех, куырдадзтæ, вагæттæ цалцæг кæныны цехтæ. Уазджытæн бацæттæ кодтой цымыдисаг экскурси. Заводы историйымæ йæ равзæрдæй абоны онг базонгæ уæвæн ис музейы.
Сæдæ азы размæ Цæгат Ирыстоны фæзындысты фыццаг вагæттæ цалцæггæнæн æрмадзтæ. Лæггад кодтой Дзæуджыхъæуы æфсæнвæндагæн. Абон заводы фæзуат у 24 гектары. Ам кусы дæсгай цехтæ æмæ хайæдтæ. Уыдоны фæллой кæны мин адæймаджы бæрц.
Заводы юбилеймæ мыхуыры рацыд чиныг «Сæдæ азы бæстæимæ æмæ къабазимæ». Йæ автортæ Андрей Гурьев æмæ Тамара Андреева йыл куыстой афæдзы дæргъы. Пайда кодтой архивтæй, газеттæй, ныхас кодтой иу сæдæ адæймагимæ.
Æнусмæ заводæн уыд бирæ къуылымпыдзинæдтæ æмæ æнтыстдзинæдтæ. Абон дæр æвзары бæлвырд зындзинæдтæ. Фæлæ, уæддæр куыстуаты разамынд архайы, цæмæй заказгæнджытæ къаддæр ма кæной, ууыл. Цалцæггонд цæуынц цехтæ, æлхæнынц нырыккон кусæнгæрзтæ, фылдæр кæнынц сæ лæггæдтæ.
Роберт Цинделиани, заводы директоры хæдивæг: «Дард стæм Уæрæсейы центрæй. Вагæттæ ардæм æрвитынæн тарифæн бирæ фидын хъæуы. Уый тыххæй асламдæр кæм уайы, уыцы заводтæм æрвитынц, уый тыххæй махмæ зындæр у. Фæлæ мах нæ продукци хорз кæнæм, æмæ нæм уый тыххæй æрвитынц вагæттæ».
Заводы юбилейон изæр ацыд Уырыссаг академион театры. Юбиляртæн раарфæ кæнынмæ æрбацыд бирæ адæм. Республикæйы разамынды минæвæрттæй паддзахадон хæрзиуджытæ райстой заводы хуыздæр кусджытæ.
