Фæстаг цалдæр азы ирон æвзаг ахуыр кæнынæн фылдæр мадзæлттæ арæзт цæуы. Фæзынд алыхуызон чингуытæ æмæ ахуыргæнæн æрмæджытæ. Сарæх сты ирон æвзаджы курсытæ дæр.
Дауыраты Зойæйы фæрцы Ирыстоны бирæ адæм базыдта ирон æвзаг. Йæ хъæппæрисæй Дзæуджыхъæуы арæзт æрцæуынц ирон æвзаджы курсытæ. Æрбацæуынц сæм куыд ирæттæ, афтæ республикæйы цæрæг æндæр адæмыхæттыты минæвæрттæ дæр.
Милдзыхты Дианæ, Клубы уæнг: «Тынг мæ фæнды, цæмæй нын нæ фыдæлтæй цы рæсугъд æвзаг баззад, уый ма фесæфа. Фæнды мæ базонын, ам æвзаг куыд амонынц, уый».
Ацы хатт цы ахуыртæ сарæзтой, уыдон иннæтæй цæхгæр хицæн кодтой. Æхсæнадон палатæйы уæнг Мæрзойты Олег сарæзта ирон дзургæ ныхасы клуб. Фыццаг фембæлдмæ æрбацæуджытæ базонгæ сты, Даурæ ирон æвзаг бахъахъхъæнынмæ цы æвæрæн бахаста, уыимæ. Йæ сарæзт методикæмæ гæсгæ уроктæ сты æнцон бахъуыды кæнæн. Зойæйы фæнды, цæмæй йæ куыстытæ фидæны сæ бынат ссарой, уый. Ирон æвзаг та, раздæрау, фидар йæ къæхтыл куыд æрлæууа.
Даурæ, фыссæг: «Не взаг, куыд фæзæгъъынц, тынг рынчын у. Канд мах нæ – ахуыргæнджытæ, фысджытæ, фæлæ ма хицауад йæ хъус кæй æрдардта ацы фарстамæ, уый хорз у. Фервæзæн ис не `взагæн, чи зоны æмæ раздахæн ис, иронау куы дзырдтой адæм, уыцы рæстæгмæ «.
Ахæм уроктæ Дзанайы-фырты уынджы чингуыты дуканийы араздзысты къуыри иу хатт, æмæ цæудзысты 2 сахаты.
Касаты Батраз, фыссæг: «Зойæ цалдæр азы аразы ацы хъуыддæгтæ, фæлæ ацы æмбырды фæрцы ирон æвзаг нæ фæхъæздыгдæр уыдзæн. Рæвдауæндæттæй райдайын хъæуы. Мæнæ Зойæ куыд зæрдиагæй кусы, афтæ куы бакусиккой, уым цы хъомылгæнджытæ кусы уыдон, уæд сывæллæттæ бауарздзысты сæ мадæлон æазаг».
Дауыраты Зойæ куыд зæгъы, афтæмæй ахæм мадзæлттæ хорз сты, фæлæ хуыздæр уаид, телеуынынады ирон æвзаджы уроктæ куы уаид, уый. Клуб саразджыты нысаниуаг та иу фембæлдæй иннæмæ фылдæр адæм бамбардзæн.
Сосранты Жаннæ
