Ныр республикæйы скъолаты уроктæ райдайынц сахаты `рдæг фæстæдæр. Уый тыххæй уынаффæ рахаста республикæйы сæргълæууæг Мамсыраты Таймураз. Ахæм курдиатимæ йæм бирæ ныййарджытæ цыди, уымæн æмæ зымæгон сæ сывæллæттæн зын уыд талынджы сыстын æмæ скъоламæ ма байрæджы кæнын.
Гæджынаты Зауыр йæ мад æмæ йæ дыууæ кæстæр æфсымæримæ скъоламæ цæуы алы бон дæр. Æрмæст раздæрау 8 сахаты æмæ 30 минутмæ нæ, фæлæ 9 сахатмæ. Бирæтæ йæ нæ зонынц, ноябры лæппу социалон сайт «Одноклассники»-йы кæй ныффыста курдиат республикæйы сæргълæууæг Мамсыраты Таймуразмæ, цæмæй скъолаты уроктæ фæстæдæрмæ аргъæвой, уый.
Гæджынаты Зауыр, Дзæуджыхъæуы 41-æм скъолайы 6-æм къласы ахуырдзау: «Мæнæн ис 2 æфсымæры æмæ райсом нæ бон нæ уыди сыстын. Æмæ президентмæ арвыстон фыстæг, цæмæй рæстæг аивой. Стæй йæ телевизорæй фехъуыстон, фæивтой скъолайы рæстæг æмæ нæ бон уыди сыстын».
Зауыры мад Замирæ куыд зæгъы, афтæмæй йæ фыртимæ уынаффæ кодта, фæлæ курдиат лæппу иунæгæй ныффыста. Æмæ æхсызгон у, Мамсыраты Таймураз æвæстиатæй разыйы дзуапп кæй радта, уый.
Гæджынаты Замирæ, Гæджынаты Зауыры мад: «Йæ фсымæртыл дæр тынг катай кодта æмæ загъта «А, æз ма стырдæр дæн, уыдон къаддæр сты æмæ тæригъæд сты. Æмæ иу бон рацыд æмæ загъта, фыстæг куы ныффысин нæ республикæйы сæргълæууæгмæ, уæд куыд уаит? Дзуапп радтит?», æмæ йын загътон «Хуамæ ратта» уый фæстæ загъта, «Ныффыстон писмо æмæ дзуапмæ æнхъæлмæ кæсын».
Гæджынаты Зауыр ахуыр кæны 41-æм скъолайы. Ам куы базыдтой, уроктæ сахатырдæг фæстæдæр райдайдзысты, уæд сæ цинæн кæрон нал уыд. Уæвгæ, скъолайы ахуыр кæны 800 адæймаджы, æмæ се ппæт дæр Зауырæй сты бузныг. Йæ фæрцы сын райсомæй ис фылдæр афынæй кæныны æмæ уроктæм ма байрæджы кæныны фадат. Æппæтæй ахсджиагдæр та у уый, æмæ ныр сывæллæттæ скъоламæ цæуынц æдæрсгæйæ, боны рухсы.
