Цæгат Ирыстоны уыцы ногдзинад фæзындзæн дыууын мин адæймагыл: адвокаттыл, нотариустыл, таксисттыл, кондитертыл æмæ æндæр хи чысыл куыстуæтты хицæуттыл.
Фарон уыцы фиддонтæ уыдысты æвддæс мин сомы. Ацы аз та хъуамæ суой æртын фондз мины. Йæхи чысыл куыстуат нырма æрæджы чи сарæзта, уыдонæн алы мæй дæр æртæ мины фидын зын вæййы. Уымæн æмæ ма ис æндæр хъалонтæ дæр. Бирæ куыстуæттæн се *фтиæгтæ дыууæ сæдæ мин сомæй фылдæр нæ вæййынц. Æмæ ныр сæ хицæутты фæнды сæ куыстуæттæ сæхгæнын. Чи зоны, æмæ кусой æнæ закъоны бындурыл. Пенсион Фонды куыд зæгъынц, афтæмæй фæдзæхстадон фиддонтæ кæй фæфылдæр кодтой, уый баст у фидæны пенситы бæрцимæ.
Быгъуылты Земфира, Цæгат Ирыстоны пенсион фонды пресс-службæйы кусæг: «Цæгат Ирыстоны ис 20 мин индивидуалон амалхъом адæймагæй фылдæр. Закъонмæ гæсгæ, уыдонæн фаронимæ абаргæйæ сæ фиддонтæ фæфылдæр сты дыууæ хатты. Кæд уыдон фарон пенсион фондмæ фыстой 14 минæй чысыл фылдæр, федералон медицинон фондмæ та 3 мины чысыл хъуагæй, уæд ацы аз пенсион фондмæ фиддзысты 2 мин сомæй фылдæр, федералон медицинон фондмæ та 3185 сомы. Уыцы ивддзинæдтæ æрцыдысты уый тыххæй, цæмæй алы индивидуалон амалхъом адæймагæн дæр йæ пенсион бартæ уой, æндæр куыстуæтты чи кусы, уыдонимæ æмхуызон».
