«Наукæмæ къæпхæн». Дзæуджыхъæуы хатдзæгтæ скодтой æрыгон иртасджыты конкурсæн. Къуыри республикæйы скъоладзаутæ æвдыстой сæ куыстытæ эксперттæн.
Хуымæтæг нымæцонты тыххæй йæ иртасæн куысты бæлвырд радзырдта Дигорайы сывæллæтты сфæлдыстады хæдзары хъомылгæнинаг Хъабанты Сослан. Лæппу тынг цымыдисæй архайдта. Уымæ гæсгæ йын йæ куыстæн жюрийы уæнгтæ скодтой стыр аргъ. Хъабанты Сослан сси конкурс «Наукæмæ къæпхæн»-ы уæлахиздзау.
Хъабанты Сослан, конкуср «Наукæмæ къæпхæн»-ы уæлахиздзау: «Ныр цы куыст бакодтам, уый мын баххуыс уыдзæн дарддæр искуыдæм ахуыр кæнынмæ куы бацæуон, уæд. Æнцондæрæй бацæудзынæн кæдæм мæ фæнды, уырдæм æмæ мын дарддæр уыдзæн æнцон адæмимæ кусын. Тынг диссаг куыст у, уымæн æмæ мæ зæрдыл бадардтон, ахуыргæнæг мын баххуыс кодта, æмæ мæ зæрдæмæ тынг фæцыди. Иннæ аз дæр архайдзынæн æмæ рамбулдзынæн».
Йæ наукон разамонæг Диамбекты Аллæ куыд зæгъы, афтæмæй бирæ сабиты фæнды иртасæн куыст кæнын æмæ сын уайгæ дæр кæны.
Диамбекты Аллæ, Дигорайы сывæллæтты сфæлдыстады хæдзары кусæг: «Ацы конкурс сывæллæттæн бирæ дæтты. Фыццаджыдæр, сывæллон бирæ куы зона, уæд йæ зондыахаст хуыздæр кæны. Хистæр сывæллæттæ чи сты, уыдонæн та университетмæ куы цæуой, æнæ экзаментæй исынц, фыццаг бынат чи райсы, уыдоны. Æмæ мæнмæ гæсгæ, уый тынг хорздзинад у».
Ныр наукон ерыс арæзт æрцыд 10-æм хатт. уыцы рæстæгмæ бирæ скъоладзатæн сси, фидæны фæндаг кæм равзæрстой, ахæм фæрæз. Йæ саразыныл бакуыстой Цæгат Ирыстоны ахуырады æмæ наукæйы министрад сывæллæтты сфæлдыстады республикон галуанимæ иумæ.
Калоты Тамарæ, сывæллæтты сфæлдыстады республикон галуаны директоры хæдивæг: «Ахæм ерыстæ куы нæ уа, æмæ сывæллон уыдолны куы нæ архайа, уæд уым сгуыхтдзинæдтæ никуы уыдзæни. Цыдæрридæр сывæллæттæ ис ацы ерысты, уыдон иууылдæр сты уæлахиздзаутæ».
Сæ курдиат сывæллæттæ æвдыстой 22 секцийы. Хистæркъласонты хсæн уæлахиздзаутæ систы 27 ахуырдзауы, кæстæр кълæсты скъоладзауты куыстытæй хуыздæртыл нымад æрцыд 22. Уымæй уæлдай ма 50 архайæгæн радтой кады гæххæттытæ. Уæлахиздзауты хсæн уыд Беслæны 8-æм скъолайы ахуырдзау Алыккаты Алинæ дæр. Æрыгон иртасæг куыд зæгъы, афтæмæй тынг зæрдиагæй архайдта.
Алыккаты Алинæ, конкурс «Наукæмæ къæпхæн»-ы уæлахиздзау: «Мæ темæ уыди мæ мыггаджы истори, базыдтон бирæ. Мæ зæрдæмæ тынг фæцыд ацы наукон конкурс, æмæ мæ фæнды ноджыдæр кæнын ахæм куыст».
Йæ ахуыргæнæг Такъæты Эльвирæимæ дарддæр дæр кусдзысты ацы темæ парахат кæныныл.
Такъæты Эльвирæ, Беслæны 8-æм скъолайы уырыссаг æвзаг æмæ литературæйы ахуыргæнæг, библиотекæйы кусæг: «Бирæ фембæлдтытæ йын уыдис йæ мыггаджы хистæртимæ, сæ цардвæнджаджы хабæрттæ хорз чи зоны, ахæм адæмимæ, архивæй дæр бирæ æрмæг æрæмбырд кодта».
Конкурс «Наукæмæ къæпхæн» сывæллæттæн фадат дæтты сæ арæхстдзинад равдисынæн, зæгъынц педагогтæ. Азæй азмæ йæ архайджыты нымæц фылдæр кæны.
Наукон ерысы архайдтой 300 скъоладзауы. Бирæтæн конкурс «Наукæмæ къæпхæн» дæтты фæндаг фидæны æнтыстдзинæдтæм, зыгъынц конкурс аразджытæ.
Гугкаты Иринæ
