Амыдта йæ йæ сæрдар Такъоты Сергей. Боны фæткы фарстаты иу хай баст уыд æнæниздзинад хъахъхъæнынады къабазимæ.
Фидаргонд æрцыд «Республикæйы цæрджытæн лæвар медицинон æххуысы паддзахадон гарантиты программæ». Уымæ гæсгæ хъуамæ фæхуыздæр уа медицинон лæггæдты хæрзхъæддзинад, фæбæрзонддæр уа дохтырты мызд. Æппæт фиддонтæ цæудзысты æнæмæнг медицинон фæдзæхстады фондыл. Хъæутæм æрыгон дохтырты æрбаздахынæн цы мадзæлттæ конд цыд, уыдонæн раздæр æхцайы фæрæзтæ дих кодта федералон бюджет. Амæй фæстæмæ ма уыцы хæстæ æвæрд уыдзысты республикон къазнайыл дæр.
Æрдзырдтой арæзтадимæ баст фарстатыл. Федералон программæмæ гæсгæ, ивддзинæдтæ хаст æрцыдысты республикон программæ «Жилище»-мæ. Уыдонмæ гæсгæ паддзахадон æххуыс хъуамæ исой, кредитон фæрæзты фæрцы коммуникацитæ чи аразы, уыцы куыстуæттæ. Æртæ сывæллоны æмæ уымæй фылдæр кæмæн ис, ахæм бинонтæ хæдзар куы аразой, уæд уыдон дæр исдзысты паддзахадон æххуыс.
Хицауады уынаффæмæ гæсгæ фæндæгты фонды фæрæзтæ дихгонд æрцыдысты бæлвырд объекттыл æмæ мадзæлттыл.
