Гергиты Валерийы номыл аивæдты колледжы музыкалон скъолайы ахуыргæнинаг адæмы размæ рахаста дунеон æмæ уырыссаг классикон уацмыстæ.
Концертмæ æрбацыдысты республикæйы музыкалон æхсæнады минæвæрттæ, музыкалон скъолайы ахуыргæнинæгтæ, стæй лæппуйы хиуæттæ.
Æппæтæй бæрзонддæр хъæлæс – дисканты хицау Сланты Тимурæн фыццаг хатт уыд йæхи концерт. Лæппуйыл цæуы 13 азы æмæ тагъд хъуамæ йæ хъæлæс аива. Уымæ гæсгæ йын ныридæгæн цы алæмæты зарыны хуыз ис, уымæ хъæуы хъусын, зæгъынц педагогтæ.
Доменико Чимарозайы зарæг «Ангел милый». Тимур æй акодта йæ фыццаг ахуыргæнæг, Уæрæсейы адæмон артисткæ Билаонты Долоресы рухс номы кадæн. Лæппуйы репертуары ис куыд уæрæсейаг, афтæ дунеон классикæйы уацмыстæ дæр.
Сланты Тимур: «Æз зарыдтæн классикон уацмыстæ, æмæ алкæмæй фылдæр мæ зæрдæмæ цæуы Хосроты Тамерланы зарæг «Зарæгхæссæг». Уым тынг рæсугъд ныхæстæ ис, йæ мелоди дæр тынг рæсугъд у».
Республикон, уæрæсейаг æмæ дунеон конкурсты лауреат æмæ уæлахиздзау. Ацы аз Сланты Тимур ахуыр фæуыдзæн Гергиты Валерийы номыл аивæдты колледжы музыкалон скъола. Фæлæ музыкæйæ архайдзæн дарддæр дæр. Йæ педагог Элла Некрасова куыд зæгъы, афтæмæй Тимурæн йæ курдиат кæронмæ нæма раргом.
Элла Некрасова, Гергиты Валерийы номыл аивæдты колледжы музыкалон скъолайы ахуыргæнæг, РЦИ-Аланийы паддзахадон филармонийы зарæггæнæг: «Ныртæккæ мах Тимуримæ фæныхас кæнæм куыд дыууæ профессионалы. Вокалы сусæгдзинæдтæ зоны. Стыр куыст бакодта. Уый бæрæг у концерты программæйыл – уацмыстæ иууылдæр сты классиконтæ».
Концертмæ æрбацыдысты республикæйы музыкалон æхсæнады минæвæрттæ, музыкалон скъолайы ахуыргæнинæгтæ, стæй лæппуйы хиуæттæ. Уæвгæ, ацы цау Тимурæн у йæ фыццаг къахдзæф музыкæйы стыр дунемæ.
Сланты Соня, Сланты Тимуры фыдымад: «Куы йæ æрбакодтон, уæдæй нырмæ цæуы æхсызгонæй, æмæ мæхицæн дæр æхсызгон у, мæ зæрдæ райы, йæ ахуыргæнджыты дæр дзæбæх сты. Мæнæн дæр тынг æхсызгон у, уый тыххæй тухæн кæнын, цæмæй стыр лæг суа, нæ Ирыстонæн аккаг хъæбул суа».
Æрæджы æрыгон зарæггæнæг ссыд Мæскуыйæ. Уым йæхи цæттæ кодта фидæны гастрольтæм.
Февралы Сланты Тимур архайдзæн хæрзаудæн концерты «Хрустальные звездочки против террора». Цæгатирыстойнаг æвзонг курдиатджын музыкант азардзæн оперон театр Ласкалайы сценæйы, Миланы.
Гугкаты Иринæ
