Конкурсы архайдтой горæты 33 скъолайы. Сфæлдыстадон ерысы хуыздæр номыртæ равдыстой гала-концерты. Фестиваль «Дзæуджыхъæу – интернационалон горæт» арæзт уыд 2 хайæ.
Фестиваль арæзт æрцыд ныр дыккаг хатт Дзæуджыхъæуы администрацийы æмæ сывæллæтты эстетикон хъомылады центр «Сфæлдыстад»-ы хъæппæрисæй.
Мамыкъаты Зæлинæ, Дзæуджыхъæуы администрацийы ахуырады управленийы методист: «Æвдисынц алыхуызон æгъдæуттæ, адæмыхæттыты культурæ æмæ традицитæ, зарджытæ, кæфтытæ. Уый у тынг ахсджиаг хъуыддаг. Ацы фестиваль, фыццаджыдæр, ахуыр кæны адæмыхæттыты хсæн ахастдзинæдтæ фидардæр кæныныл, æмæ кæрæдзийæн æгъдау дæттыныл, кад кæныныл».
Æдæппæтæй фестивалы архайдта 33 скъолайы. Алчидæр сæ бацæттæ кодта чысыл программæ. Радзырдта дзы алы адæмыхæттыты æгъдæутты тыххæй. Конкурсы фенæн уыд дзуттаг чындзæхсæв, дагестайнаг кæфтытæ, уырыссаг культурæ. Фылдæр архайджыты бафæндыд ирон адæмы æгъдæутты тыххæй радзурын. Се хсæн 22-æм скъолайы ахуырдзаутæ дæр.
Коцойты Зауырбег, Дзæуджыхъæуы 22-æм скъолайы ахуырдзау: «Дыккаг хатт ацы фестивалы бацахстам фыццаг бынат. Ацы фестиваль мæ зæрдæмæ цæуы. Зарджытæ нæм уыдис, кæфтытæ, æмæ инсценировкæ. Нæхи цæттæ кодтам 2-3 къуырийы. Урочыты фæстæ алы бон дæр нæ ахуыргæнджытимæ».
Фестивалы хатдзæгтæм гæсгæ 15 скъолайы систы уæлахиздзаутæ, фараст командæйы райстой конкурсы лауреаты дипломтæ, ноджы дæр ма 9 скъолайы та хорзæхгонд æрцыдысты кады гæххæттытæй.
Хъайтмазты Дзерассæ
