Сабаты Дигорайы «Жигули» сцавта уæзласæн Газель. Рог машинæйы шофыр ныццавта йæ сæр æмæ йæ аластой районы рынчындонмæ.
Адæймаг кæм фæмард, иу ахæм фæндаггон фыдбылыз æрцыд Беслæны дæр. Сабаты, 24-аздзыд нæлгоймаг скъæрдта «БМВ» æмæ йæ машинæмæ нæ сарæхст, афтæмæй сцавта Беслæны фæндæгтæм цæстдарды службæйы пост. Аварийы фæмард, шофыры фарсмæ цы 15-аздзыд лæппу бадтис, уый.
Автоинспекцийы кусджытæ куыд сбæрæг кодтой, афтæмæй машинæ чи скъæрдта, уыцы нæлгоймаг уыд нозтджын. Æмæ афтæмæй фыццаг хатт не скъæрдта машинæ. Ахæм закъонхæлдты тыххæй нæлгоймаг уый размæ дæр баййæфта административон æфхæрд. Уыимæ ма йæм никуы уыд машинæ скъæрынæн бардæттæг гæххæтт.
Республикæйы фæндæгтыл ма ноджыдæр æрцыд дыууæ фæндаггон фыдбылызы. Бахаудтой дзы æнахъом сывæллæттæ. Сабаты, Попов хутормæ хæстæг, цалдæр æрыгон адæймаджы æрцæйцыдысты сæ фæлладуадзынæй, шофыр нæ сарæхст йæ машинæмæ æмæ скъуырдта бæлас. Фыдбылызы хъыгдард баййæфта 15-аздзыд чызг, цæфтимæ йæ аластой республикон клиникон рынчындонмæ.
Фæндаггон фыдбылыз æрцыд хуыцаубоны дæр Дзæуджыхъæуы Горькийы æмæ Фрунзейы уынгты тигъыл. 17-аздзыд лæппу райста йæ фыды Жигули æмæ сцафта дыууæ машинæйы. Шофыры æмæ йæ фарсмæ цы бæлццон уыди, уыдоны цæфтимæ аластой сывæллæты клиникон рынчындонмæ.
