Хаст æм æрцыд 35 нывы, стæй Нарты кадджытæм гæсгæ конд 8 графикон иллюстрацийы. Равдыст байгом кæныны офицалон хайы архайдтой республикæйы зындгонд нывгæнджытæ, аивадуарзджытæ.
Дуне хи цæстæнгасæй. Афтæ зæгъдзæн, Цæгат Ирыстоны сгуыхт нывгæнæг Харебаты Валаны куыстытæм чи бакæсдзæн, уый. Стыр курдиаты хицау чысылæй нырмæ уарзы ахорæнты руаджы йæ миддуне раргом кæнын. Фæлæ аивадмæ йæ фæндаг уыд дæргъвæтин. Валан фыццаджыдæр фæцис Мæскуыйы Паддзахадон университеты журналистикæйы факультет, акуыста телеуынынады дæр, фæлæ ныв кæнын йæ зæрдæмæ тынгдæр цыд æмæ бацыд Цхинвалы Тугъанты Махарбеджы номыл нывкæнынады училищæмæ.
Харебаты Валан, РЦИ-Аланийы сгуыхт нывгæнæг: «Мæ фыд уыд журналист æмæ Чъребамæ ссыд Мæскуыйы паддзахадон университетмæ бацæуыны лимит. Æз æй фæдæн каст. Куыстон телеуынынады хъæууон хæдзарады редакцийы. Фæлæ мæнæй цæй хъæууон хæдзарады журналист ис. Уымæ гæсгæ райдыдтон Нарты каджытæй нывтæ кæнын».
Адæймаг йæ царды хъуамæ самайæ хæдзар, ныссадза бæлас æмæ схъомыл кæна фырт. Се ппæт дæр Валан сæххæст кодта. Самадта аивады хæдзар, паддзахиуад дзы кæнынц йæхи æмæ фырты конд нывтæ. Валаны фырт Давидмæ нывкæныны курдиат фыццаг банкъардта йæ фыд, уый фæстæ та Уæресейы сгуыхт нывгæнæг Бедойты Шалва.
Фырт фыдæй хуыздæр хъуамæ уа, зæгъы ирон æмбисонд æмæ уыимæ разы у Валан дæр. Дыууæ нывгæнæгæн сæ курдиат хицæн кæны. Фыд йæ нывты баиу кæны таурæгътæ æмæ нырыккон цард, афтæмæй йын дзы рауайы радзырд, кæнæ æнæхъæн роман. Давид та йе сфæлдыстады æвдисы бæлвырд цау. Нырыккон цæстæй кæсы дунемæ.
Ацы равдысты фыд æмæ фырт равæрдтой 35 нывы, стæй Нарты кадджытæм гæсгæ 8 графикон иллюстрацийы. Портретон галереяйы æвдыст цæуынц Къостайы портрет Зикарайы æфцæгыл, ис автопортреттæ дæр, стæй «Мад гæдыимæ» æмæ бирæ æндæр нывтæ.
Валан зæрдæйæ уарзы музыкæ дæр. йæ фсымæр зындгонд артист Харебаты вадимимæ сæ зарджытæ балæвар кодтой равдыстмæ æрбацæуджытæн. Адæм сæм хъуыстой, сæрмагонд манитоорыл та кастысты равдыстмæ хаст чи нерцыд уыцы еывтæм. Ахæм изæрæй аивад уарзджытæ райстой стыр удынцойдзинад. Фыд æмæ фыртæн та сæ зæрдæ зæгъы, ацы равдыст сæ сæдæйы сæр куыд фæуа.
Моргуаты Ладæ
